رادیۆی دەنگ

 

لەبارەی داوای بەڕێوبەری پەروەردەی گەرمیان بەمەبەستی گەڕانەوەی مامۆستایانی گەرمیان بۆ دەوام، وتەبێژی ئەنجومەنی مامۆستایەکی ناڕازیی لە گەرمیان دەڵێت: بڕیار لای مامۆستایانە.

 

پێرێ عەدنان حسێن، بەڕێوبەری گشتی پەروەردەی گەرمیان، بە رادیۆی دەنگی راگەیاند: تەنها قوتابیان و مامۆستایانی گەرمیان ماوە بگەڕێنەوە بۆ هۆڵەکانی خوێندن و ۳٥ رۆژ ماوە بۆ تاقیکردنەوەکان. وتیشی: دەست و چاوی مامۆستایان ماچ دەکەم ئەم مانگ و نیوە بگەڕێنەوە هۆڵەکانی خوێندن، راستە دۆخی موچە وایلێهاتوە، بەڵام دەسەڵاتی ئێمە نییە.

 

لەبەرامبەردا هەردی عەباس، وتەبێژی ئەنجومەنی مامۆستایانی ناڕازیی لە گەرمیان، بۆ رادیۆی دەنگ وتی: ئەمساڵ مامۆستایان بەبڕیارێکی سەربەخۆیانەی خۆیان دەستپێشخەر بون لە بایکۆتکردنی هۆڵەکانی خوێندن لەبەرامبەر نەدانی موچەکانیان، بۆیە بڕیار لای مامۆستایانە، ئێمەش پێمان وایە دواکەوتنی موچە زیاتر مامۆستایان سوردەکات لەسەر هەڵوێستەکانیان.

 

وتیشی: ئێمەش وەکو ئەنجومەنی مامۆستایانی ناڕازیی لە گەرمیان پشتیوانی مامۆستایانین و پێمانخۆشە دۆخی موچە چارەبکرێت، بەڵام تۆپەکە لە گۆڕەپانی حکومەتە کە دەبێت دۆخی موچەخۆران چارەسەر بکات.

 

دەشڵێت: ئێمە وەک مامۆستایان پێمانخۆشە رۆژێک زوتر دەستکەینەوە بەدەوام، بەڵام بەبێ پارە و بەگیرفانی بەتاڵ ئەگەر دەوامیش بکرێت دەوامێکی تەواوەتی نییە.