رادیۆی دەنگ 

دوای ئەوەی تەرمی ۲ کەس لە ناوچەی پیشەسازیی کەلار دۆزرایەوە کە بە فیشەک گیانیان لەدەستدابو، بەڕێوبەرایەتی پۆلیسی گەرمیان رایدەگەیەنێت کە لێکۆڵینەوە لەشوێنی روداوەکە کراوە و چاوەڕێی ئەنجامی پزیشکی دادین.

بەیانی ئەمڕۆ لەناوچەی پیشەسازیی قەزای کەلار تەرمی دوکەس بەناوەکانی 'سامان سەردارـی تەمەن ۳٥ ساڵ' و 'محەمەدـی تەمەن عەلی ۲۹ ساڵ' لە دوکانێکدا لە ناوچەی پیشەسازیی کەلار دۆزرایەوە.

بەپێی بەزانیارییەکانی رادیۆی دەنگ، دوکانەکە هی محەمەد بوە کە پیشەوەر "فیتەر" بوە و بەپێی وتەی شایەتحاڵان سامانیش هاوڕێی نزیکی بوە.

لەبارەی دواین زانیارییەکانەوە ئایا کوژراون یاخود هۆکاێکی دیکە، عەقید- سۆران محەمەد غەریب، وتەبێژی بەڕێوبەرایەتی پۆلیسی گەرمیان بە رادیۆی دەنگی راگەیاند: دوای ئەوەی پۆلیس ئاگادارکرایەوە رۆشتینە شوێنی روداوەکە، دەرگاکە داخرابو، ناچار بوین دەرگاکە بشکێنین و رۆشتینە ژورەوە.

وتیشی: تەرمی هەردو کەسەکە کەوتبو لەزەویدا، ئاسەواری فیشەک بەجەستەیانەوەبو، هاوکات دەمانچەیەکش لەشوێنی روداوەکە دۆزرایەوە.

دەشڵێت: وەکو ئەرکی بەڵگەوتاوان لێکۆڵینەوەمان لەشوێنەکە کردوە و دەمانچەکەشمان ناردوە بۆ پشکینین.

بەپێی وتەی وتەبێژی بەڕێوبەرایەتی پۆلیسی گەرمیان؛ تەرمەکان نێردرانە پزیشکی دادی کەلار و دوای پشکنینیان رادەستی کەسوکاریان کرانەوە. 

وتیشی: ناتوانین لەئێستادا زیاتر بڵێین تاوەکو پشکنین و لێکۆڵینەوەکان تەواو دەبن، هەرکات تەواوبێت ئەوکات رایدەگەیەنین هۆکاری راستی روداوەکە چی بوە.