رادیۆی دەنگ

دوای ئەوەی بەشێک لە بەشداربوانی پرۆژەی مامۆستایان کارەبایان لێبڕا، وەبەرهێنانی گەرمیانیش لەبارەی بابەتەکەوە دەڵێت: پێشتر هەردولا رێککەوتنیان کردوە.

ژمارەیەک هاوڵاتی کە دانیشتوی پرۆژەی مامۆستایانن لە کەلار، بە رادیۆی دەنگیان راگەیاند: کۆمپانیای جێبەجێکاری پرۆژەکە هەستاوە بە بڕینی کارەباکەیان و بێبەشکردنیان لەو خزمەتگوزارییە سەرەتاییە.

هەر ئەوکات کۆمپانیای جێبەجێکاری پرۆژەکە، لە رونکردنەوەیەکدا بۆ رادیۆی دەنگ وتیان: پچڕانی کارەبا پەیوەندی بە نەدانی قیستەوە هەیە، چونکە ئەمە رێککەوتنێکی پێشوترە لە نێوان ئێمە و بەشداربواندا.

لە بەرامبەردا هونەر مەحمود، بەڕێوبەری گشتی وەبەرهێنانی گەرمیان، بۆ رادیۆی دەنگ وتی: پێشتر کۆمپانیاکە و بەشداربوان رێککەوتون لەسەر ئەوەی ئەگەر بەشداربو قیست نەدات، ئەوا کۆمپانیا بە مافی خۆی دەزانێت کارەبا و ئاوی لێببڕێت.

وتیشی: بەشێک لەبەشداربوان چەند قیستێکیان نەداوە بەسەر یەکەوە، بەشێکی دیکەیان پارەی چەندین مانگ خزمەتگوزاریی (کارەبا، ئاو و پاککردنەوە) قەرزدارن و نەیانداوە بە کۆمپانیا.

دەشڵێت: هەرچەندە لەڕوی یاساییەوە کۆمپانیاکە مافی خۆیەتی، بەڵام بەهۆی دۆخی دارایی بەشداربوانەوە قسەمان لەگەڵ کردون بۆ ئەوەی بوەستن لەسەر بەشداربوان.