رادیۆی دەنگ 

دوای گڕگرتنی مۆزەخانەی گەرمیان و کوژاندنەوەی، بەڕێوبەری شوێنەواری گەرمیان جەخت لە سەلامەتی شوێنەوارەکان دەکاتەوە دەڵێت: بەهۆی شۆرتی کارەباوە بوە.

ساڵح محەمەد سەمین، بەڕێوبەری شوێنەواری گەرمیان بۆ رادیۆی دەنگ وتی: ئەو شوێنەوارانەی لە نێو مۆزەخانەکەدا دانراون سەلامەتن، دەتوانم بڵێم سەدا ۹٥ـی دوکەڵی بەرنەکەوتوە، چونکە لەنێو بۆکسی شوشەدا بون.

وتیشی: تەنها چەند دانەیەک نەبێت دوکەڵی بەرکەوتوە ئەویش تەنها پاککردنەوەی دەوێت.

لەبارەی هۆکاری روداوەکەوە، بەڕێوبەری شوێنەواری گەرمیان ئاشکرای کرد کە روداوەکە بەهۆی شۆرتی کارەباوە بوە، ژمارەیەک گڵۆپ و سپلیتێک و چەند شتێکی دیکەی ئاسایی سوتاون.