رادیۆی دەنگ

لقی گەرمیانی سەندیکاكانی کرێکارانی کوردستان رایدەگەیەنێت کە راپرسیان کردوە لەناو سەرتاشەکانی کەلار و بڕیاریانداوە کارکردنی رۆژانەیان لە کاتژمێر ٨ـی بەیانی بۆ ٨ـی ئێوارە بێت.

عەدنان محەمەد، سەرۆکی لقی گەرمیانی سەندیکاکانی کرێکاران و پیشەوەران، بە رادیۆی دەنگی وت: راپرسیمان کردوە لەناو سەرتاشەکاندا کە پێنج رۆژی خایاندوە، تیایدا بڕیاریانداوە هاوشێوەی شارەکانی تری هەرێمی کوردستان، کارکردنیان لە کەلاریش لەکاتژمێر ٨ـی بەیانی تا ٨ـی ئێوارە بێت.

رونیکردەوە: لە کۆی ٢٤٥ سەرتاش لە سنورەکە، ٢٠١ سەرتاش رەزامەندبون لەسەر دیارییکردنی ئەو ١٢ سەعاتە بۆ کارکردن، لە بەرامبەردا ٤٤ سەرتاش رازیی نەبون.

وتیشی: هەربۆیە نوسراوێکمان ئاراستەی قایمقامیەتی کەلار کردوە بۆ ئەوەی لیژنەیەک لە لایەنە پەیوەندیدارەکان پێکبێنن بۆ بڕیاردان لەسەر چۆنیەتی کارکردنی سەرتاشخانەکان و جێبەجێکردنی داواکارییەکان.