رادیۆی دەنگ

 

بەهۆی هەڵشکانی نوسینگەیەکی دراوەوە، بازاڕی دراو لە کەلار ماوەی چەند رۆژێکە توشی شۆک بوە و مامەڵە تیایدا تا ئاستی وەستان و پشێوی رۆشتوە.

 

بەپێی بەدواداچونەکانی رادیۆی دەنگ، نوسینگەیەکی دراو لە بازاڕی کەلار لە چەند رۆژی رابردودا توشی هەڵشکان و مایەپوچبون  "ئیفلاس" بوەتەوە و پارەیەکی زۆری ئەو هاوڵاتی و کاسبکار و نوسینگە و بازرگانانەی لابوە، فەوتاندوە.

 

هەربەپێی زانیارییەکان، بڕی ئەو پارەیەی کە واباس دەکرێت لە نوسینگەکەدا فەوتابێت، سەروی ٣ ملیۆن دۆلارە، کە هی خودی خاوەنانی نوسینگەکە و بازرگان و کاسبکار و نوسینگەکانی دیکەی دراو و هاوڵاتیانن.

 

بەهۆی ئەم روداوەوە، بازاڕی دراوی کەلار توشی پشێوی بوە و جوڵە و مامەڵە تیایدا تا ئاستی وەستان کەمیکردوە، ئەمەش بەوهۆیەی زیانی لە متمانەی بازرگان و کاسبکاران داوە و ناوێرن مامەڵەی گەورە ئەنجام بدەن، جگە لەوەش بەشێکی زۆر لەو هاوڵاتی و بازرگانانەی پارەیان لای نوسینگەکانە، دەیبەنەوە؛ ئەمەش وادەکات پارەی نەختینە لە بازاڕەکەدا کەمبکاتەوە و مامەڵەکانیش بوەستن.