رادیۆی دەنگ

 

بەڕێوبەری گشتی پەروەردەی گەرمیان ئاشکرای دەکات لە ئەمڕۆوە بایکۆت لە ناوەندەکانی خوێندن دەشکێت و دەوام دەستپێدەکاتەوە.

 

عەدنان حسێن، بۆ رادیۆی دەنگ وتی: ئەمڕۆ لەپاش کۆبونەوەیەکی چڕوپڕ بەئامادەبونی ١٨٣ بەڕێوبەری قوتابخانە و خوێندنگا، لە کۆتاییدا بڕیاری دەوامکردنمان دا و لە ئەمڕۆوە دەست دەکەینەوە بە دەوامکردن.

 

وتیشی: زۆربەی ناوەندەکانی خوێندن پێشتر دەوامی پۆلی ٩ و ١٢ـیان کردوە، بەڵام پۆلە ناکۆتاییەکان مابون.

 

جەختیشیکردەوە: لە ئەمڕۆ و سبەینێوە دەوامە هاوشێوەی پارێزگاکانی سلێمانی و هەڵەبجە و ئیدارەی راپەڕین.

 

پێشتر مامۆستایان بە کاریگەریی پێنەدانی موچەکانیان دەستیان بە مانگرتن و بایکۆتی دەوام کردبو.

 

لەمبارەیەوە بەڕێوبەری گشتی پەروەردەی گەرمیان وتی: موچە خەرج دەکرێت، موچەی مانگی ٢ (شوباتی ٢٠٢٥) خەرجکراوە، شەوی رابردوش تاوەکو درەنگانێک لیستی موچەی مانگی ٣ (ئاداری ٢٠٢٥)ـیشمان ئامادەکرد و نارد بۆ ئەوەی پێش جەژنی رەمەزان خەرج بکرێت.