دەنگ نێت

 

تۆڕی پاراستنی تەندروستی گشتی باس لە دیارنەمانی پارەی کارمەندانی نەخۆشخانەی قەڵا دەکات، سەرپەرشتیاری نەخۆشخانەکەش رەتی دەکاتەوە دەڵێت: گۆڕانکاری کراوە.

 

بەپێی راگەندراوێک کە لە پەیجی تۆڕی پاراستنی تەندروستی گشتی بڵاوکراوەتەوە، تیایدا هاتوە: ئەو بڕە پارەیەی بۆکارمەندانی نەخۆشخانەی قەڵای تایبەت بە هەناوی کە لەلایەن یەکێتی نیشتمانییەوە دابین دەکرێت و بڕەکەی 57 ملیۆن دینارە، ناڕونی لەدابەشکردنی دا هەیە، بەجۆرێک کە نزیکەی 20 کارمەند ئێستا لە شوێنی دیکە دامەزراون، بەڵام موچەکانیان وەردەگیرێت و دیار نیە دەدرێت بەکێ.

 

ئاماژەیان بەوە کردوە: لەلایەن چەند کەسایەتیەکەوە نزیکەی 10ملیۆن لە پارەکەیان دەبردرێت و موچەکانیشیان کەمکراوەتەوە لە 500 هەزار بۆ 400 هەزار دینار.

 

لایخۆشیەوە سەرپەرشتیاری نەخۆشخانەکە، سەرجەمی زانیاریەکان بەهەڵە ناودەبات.

 

د. حارس محەمەد، رەتی دەکاتەوە لەو بڕە پارەیەی بۆیان دەنێردرێت بەشێکی لێ دیار نەمابێت و دەڵێت: هەموی وەکخۆی خەرج دەکرێت.

 

دەڵێت: هەندێک گۆڕانکاری کراوە لەوانە پێشوتر 3 کارمەندمان داناوە بە موچەی 500 هەزار دینار ئیستا ژمارەی کارمەندەکانمان زیاد کردوە و رێژەی موچەکە کەمکراوەتەوە.

 

باسی لەوەشکرد لەبەرامبەر ئەو بابەتەدا دواتر رونکردنەوەی زیاتریان دەبێت.

 

بەشی نەخۆشخانەی قەڵا لەلایەن خێرخوازانەوە بۆ بەرەنگاربونەوەی کۆرۆنا دروست کرا و موچەی بەشێک لە کارمەندەکانیشی لەلایەن ئیدارەی گشتی یەکێتی نیشتمانییەوە دابین دەکرێت.