بۆ ماوەی زیاتر لە دو ساڵە ناحیەی باوەنور بێ سەرۆکی شارەوانییە، بەڕێوبەری گشتی شارەوانیەکانی گەرمیانیش هۆکارەکەی دەگەڕێنێتەوە بۆ بڕیارێکی ئەنجومەنی وەزیران.

ئەرسەلان ئەحمەد، بەڕێوبەری گشتی شارەوانیەکانی گەرمیان بۆ رادیۆی دەنگ وتی: بەشێکی دانەنانی سەرۆکی نوێ بۆ شارەوانی ناحیەی باوەنور بڕیارێکی ئەنجومەنی وەزیرانە کە گواستنەوەی لە نێوان فەرمانگەکان و وەزارەتەکان راگرتوە ئەمە هۆکارە بۆ ئەو بابەتە.

دەشڵێت: لە نێو خودی سەرۆکایەتی شارەوانی ناحییەکە خۆی کەسێک نیە ئەو بەرپرسیارێتیە وەربگرێت، ئەگەر هەبێت هیچ لارییەکمان نییە.

ناحییەی باوەنور زیاتر لە ۲ ساڵە بێ سەرۆکی شارەوانییە، بەپێی وتەی بەڕێوبەری گشتی شارەوانییەکانی گەرمیانیش سەرۆکی شارەوانی ناحیەی شێخ تەویل بە وەکالەت پۆستەکە بەڕێوەدەبات و هیچ گرفتێکی نیە لە ئێستادا.