دەنگ نێت

 

جارێکی دیکە دابەشکردنی موچە لە گەرمیان راگیرا، بەرێو بەری بانکی گەرمیانیش هۆکارەکەی ئاشکرادەکات.

 

بەپێی خشتەی وەزارەتی دارایی بۆ دابەشکردنی موچەی مانگی نیسانی ٢٠٢٢، دەبو ئەمڕۆ (٢٤ـی ئایار) هەردو وەزارەتی ئاوەدانکردنەوە و رۆشنبیری موچەیان وەربگرتایە، بەڵام بەهۆی نەبونی پارەوە لە بانکی گەرمیان، موچەکە بە فەرمانگەکانی ئەو دو وەزارەتە لە گەرمیان نەدراو و  پرۆسەکە دواخراوە بۆ سبەینێ.

 

بەرێوبەری بانکی گەرمیان، ئاریا ئەنوەر، جەختی لە هەواڵەکە کردەوە و بۆ رادیۆی دەنگ وتی:  «هۆکاری دابەشنەکردنەکە بۆ دواکەوتنی بەدەستگەشتنی پارە دەگەڕێتەوە»، بەبێ ئەوەی زانیاری زیاتر بدات.

 

هاوکات باسی لەوەشکرد: لە لایەن بانکی گشتی هەرێمەوە ئاگادار کراونەتەوە کە سبەینێ پارەی پێویستیان بەدەست دەگات و دەست بەدابەشکردنی موچە دەکەنەوە.

 

 سەبارەت بەو وەزارەتانەی کە سبەینێ بۆ دابەشکردنی موچەکەیان دیارییکراوە، ئاریا ئەنوەر وتی: هەوڵ هەیە موچەی ئەوانیش لەکاتی خۆی دا دابەشبکرێت.