ده‌نگ نێت

 

به‌هۆی زیادكردنى نرخی كرێی قه‌پانه‌وه‌، شۆفێرانى بارهه‌ڵگر له‌ به‌یانى ئه‌مڕۆوه‌ رێگه‌ى كه‌لار- ده‌ربه‌ندیخانیان داخستوه‌.

 

رێژه‌ن بورهان، به‌ڕێوبه‌رى هاتوچۆی ده‌ربه‌ندیخان، به‌ رادیۆی ده‌نگى وت: ژماره‌یه‌ك له‌ شۆفێرانى بارهه‌ڵگر رێگه‌ى هاتوچۆی كه‌لار - ده‌ربه‌ندیخانیان داخستوه‌ له‌ ده‌روازه‌ى قه‌زاى ده‌ره‌به‌ندیخانه‌وه‌، ئه‌مه‌ش به‌هۆی بڕیارێكى حكومه‌ته‌وه‌ بۆ به‌رزكردنه‌وه‌ى نرخی كرێی قه‌پانیان له‌سه‌ریان.

 

وتیشی: نرخه‌كه‌ له‌ 3 هه‌زاره‌وه‌ كراوه‌ به‌ 5 هه‌زار دینار.

 

هه‌ر ئه‌مڕۆش شۆفێرێك ڤیدیۆیه‌كى ئه‌و رێگه‌یه‌ى بۆ رادیۆی ده‌نگ نارد كه‌ تیایدا ده‌رده‌كه‌وێت قه‌ره‌باڵه‌غیه‌كى زۆر دروست بوه‌.

 

به‌ڕێوبه‌رى هاتوچۆی ده‌ربه‌ندیخان، جه‌ختى له‌ بونى قه‌ره‌باڵه‌غیه‌كى زۆر كرده‌وه‌ و باسی له‌وه‌كرد: به‌شێوه‌یه‌كى كاتى ده‌یانه‌وێت له‌ رێگه‌ى گونده‌كانى بناری به‌مۆ و ژاڵه‌ناو و مه‌یدانه‌وه‌ ئۆتۆمبیلی بچوك هاتوچۆ پێبكه‌ن.