ده‌نگ نێت

 

لەیادی تاوانی ئەنفالدا ئەمساڵ ژماره‌یه‌ك له‌ کەسوکارانی ئەنفال لەبری یادکردنەوە بڕیاری خۆپیشاندان دەدەن، رێکخراوێکی تایبه‌تمه‌ندى ئه‌و بوارەش دەڵێت: حکومەت خۆی بەرپرسە لەو هەڵوێستەی کە بەرامبەریان دەگیرێتە بەر.

 

لە سی و چواره‌مین ساڵیادی تاوانی ئەنفالدا، کەسوکارێکی ئەنفال دەڵێت: لەو رۆژەدا خۆپێشاندان ئەنجامدەدەین، گوێ لە وتاری هیچ بەرپرسێک ناگرین، خۆشیان بوێریی ئامادەبونیان نیە.

 

زانا جومعە، بە رادیۆی دەنگی وت: باوکم بەر شاڵاوی ئەنفال کەوتوە، بەڵام هێشتا روفاته‌كه‌یمان بۆ نەگەڕێنراوەته‌وه‌.

 

دەشڵێت: "کەمتەرخەمی کراوە بەرامبەر بە کەسوکارانی ئەنفال لە نەگەڕانەوەی روفاتەکانیان و خزمەتنەکردن بەکەسوکارانیان کە زەویان بەسەردا دابەشکراوە، بەڵام تەنها ژمارەیه‌ک بوە"، له‌ ئاماژه‌یه‌كدا بۆ ئه‌و پرۆسه‌یه‌ى دابه‌شكردنى زه‌وی به‌سه‌ر كه‌سوكارى شه‌هید و ئه‌نفال كه‌ ساڵی رابردو له‌ كه‌لار به‌ڕێوه‌چوه‌ و وارسه‌كانیان ته‌نها ژماره‌ى "هه‌واییان" پێدرا به‌بێ ئه‌وه‌ى زه‌وی هه‌بێت بۆ پێدانیان.

 

لایخۆشیه‌وه‌ سەرۆکی کۆمەڵەی داکۆکی لە پرسی ئەنفال، هاوڕێ پێشڕەو، بە رادیۆی دەنگی راگەیاند: رایەکی بەو شێوەیە لە نێو کەسوکارانی ئەنفالدا دروست بوە کە خۆپیشاندان ئەنجامبدەن.

 

وتیشی: بەهۆی ئەوەی داخوازییە سەرەتاییەکانی کەسوکارانی ئەنفال جێبەجێ نەکراوە، ئەوە خودی حکومەت بەرپرسە بەرامبەر ئەو بابەتە.