دەنگ نێت

 

شۆفێرانی ئۆتۆمبیلە گوێزەرەوەکانی نەوتی کێڵگەی حەسیرە لە گەرمیان کۆتاییان بە مانگرتنیان ھێنا.

 

سەرچاوەیەکی ئاگادار بە رادیۆی دەنگی وت: دوانیوەڕۆی ئەمڕۆ شۆفێرانی ئۆتۆمبیلە تانکەرەکانی گوێزەرەوەی نەوت لە کێڵگەی حەسیرە مانگرتنیان کۆتایی پێھێناوە و بڕیاریان داوە دەست بە بار گواستنەوە بکەن.

 

ھۆکاری مانگرتنی شۆفێرەکان، کەمی نرخی گواستنەوە بوە کە تەنی بە ٢٤ ھەزار دینار دیارییکراوە و بەوتەی شۆفێران زۆر کەمە و تەنھا بەشی خەرجیەکانیان دەکات.

 

سەرچاوەکە رونیکردەوە: شۆفێرەکان بەڵێنیان پێدراوە لە مانگی نیسانەوە گۆڕانکاریی لەو نرخەدا بکرێت، بەوھۆیەشەوە بڕیاریانداوە مانگرتنەکەیان بشکێنن و بگەڕێنەوە کار.

 

 کێڵگەی نەوتی گەرمیان کە بە حەسیرە ناودەبرێت بەوھۆیەی کەوتوەتە  گوندی حەسیرەی سەر بە ناحیەی سەرقەڵایە لە قەزای کفری، گەورەترین کێڵگەی بەرھەمھێنانی نەوتە لە سنوری سلێمانی و بەوتەی کۆمپانیای گازپرۆمی روسی کە وەبەرھێنان لە کێڵگەکەدا دەکات، رۆژانە لەنێوان ٣٠ بۆ ٤٠ ھەزار  بەرمیل، بەرھەمی نەوتی ھەیە.