ده‌نگ نێت

 

روداوى سوتاندنى باره‌گاى رێكخراوى هاوكارى ئه‌ڵمانى له‌ قه‌زاى كفری، شه‌پۆلێك ئیدانه‌ و ناڕه‌زایه‌تى زۆری لێده‌كه‌وێته‌وه‌، هونه‌رمه‌ندێكيش ده‌ڵێت: ئەرکی هێزی ئەمنییە ئەم دیاردەیە ڕاگرێت.

 

سه‌رله‌به‌یانى ئه‌مڕۆ هه‌ینی، باره‌گاى رێكخراوى هاوكارى ئه‌ڵمانى سوتا، به‌وته‌ى سه‌رپةرشتیاری پرۆژه‌كانى رێكخراوه‌كه‌، كه‌سێك له‌ په‌نجه‌ره‌ى پشته‌وه‌ هاتوه‌ته‌ ناو بیناكه‌ و ئاگرى لێ به‌رداوه‌.

 

ئه‌م روداوه‌ ناڕه‌زایه‌تى و ئیدانه‌یه‌كى زۆری لێكه‌وته‌وه‌، بةتايبةتى كة باس له‌وه‌كراوه‌ رێكخراوه‌كه‌ خزمه‌تێكى زۆری ده‌ڤه‌ره‌كه‌ى كردوه‌.

 

د. یاسین ئاشور، مامۆستاى زانكۆ، له‌وباره‌وه‌ نوسیویه‌تى: "رێکخراوی هاریکاریی ئەڵمانی؛ یەکێک لەبەسودترین و چالاکترین ڕێکخراوەکانی گەرمیان، لەهەمووی گرنگتر ئەم ڕێکخراوە؛ شاری کفری کردوەتە شوێنی سەرەکی ئۆفیسەکەیی لەوێوە ئیدارەی کاروچالاییەکانی لەگەرمیان ئەکات". 

 

ده‌شڵێت: هیوادرین هێزە ئەمنییەکان بەزووترین کات هۆکارەکەی ئاشکرا بکەن.

 

دڵنیا مه‌حمود، هونه‌رمه‌ند، له‌ هه‌ژمارى خۆی له‌ فه‌یسبوك له‌وباره‌وه‌ ده‌ڵێت: ئه‌م روداوه‌ لەکاتێکدایه‌ ئەوەی ئەم ڕێکخراوە کردوویەتی لەپاش ڕاپەڕینەوە هیچ ڕێکخراوێک نەیکردووە. ده‌شڵێت: ئەرکی هێزی ئەمنییە ئەم دیاردەیە ڕاگرێت

 

هاوكات ده‌یان پۆستى پشتگیریی له‌ رێكخراوه‌كه‌ و ئیدانه‌كردنى روداوه‌كه‌ له‌ تۆڕه‌ كۆمه‌ڵایه‌تیه‌كان بڵاوكراوه‌ته‌وه‌.

 

هاوكات سه‌نته‌رى میترۆ بۆ داكۆكی له‌ ئازادى رۆژنامه‌وانى، له‌باره‌ى روداوه‌كه‌وه‌ به‌یاننامه‌یه‌كى بڵاوكردوه‌ته‌وه‌ و داواى كردوه‌ حكومه‌ت ده‌ستبه‌جێ به‌دواداچون بكات بۆ روداوه‌كه‌ و ئاشكراكردنى بكه‌ره‌كانى.