ده‌نگ نێت

 

بۆچه‌ندین جاره‌ له‌ لایه‌ن كه‌سانێكى نه‌ناسراوه‌وه‌ په‌یوه‌ندى به‌ خاوه‌ن پێداویستیه‌ تایبه‌ته‌كانى گه‌رمیانه‌وه‌ ده‌كرێت به‌وه‌ى موچه‌ فه‌وتاوه‌كانیان بۆ ده‌گه‌ڕێنرێته‌وه‌ و له‌به‌رامبه‌ردا داواى كارتى مۆبایلیان لێده‌كه‌ن، به‌ڕێوبه‌رى چاودێرى و گه‌شه‌پێدانى كۆمه‌ڵایه‌تى گه‌رمیانیش ده‌ڵێت: سكاڵاى یاسایمان تۆماركردوه‌ بۆ ئه‌و مه‌به‌سته‌.

 

ئه‌مه‌ له‌ كاتێكدایه‌ چه‌ندین جاره‌ له‌لایه‌ن چەند کەسێکه‌وه‌ بە ناوی تۆڕی پاراستنی کۆمەڵایەتی تەلەفون دەکەن بۆ خاوه‌ن پێداویستیه ‌تایبه‌ته‌كانى گه‌رمیان و داوای کارتی موبایل و پارەیان لێده‌كرێت لەبەرامبەر گێرانەوەی موچەی فەوتاویان لە رابردودا یان وەرگرتنی زەوی نیشتەجێ بون، به‌ڵام تاوه‌كو ئێستا ئه‌و كه‌سانه‌ ئاشكرا نه‌كراون و به‌ سزا نه‌گه‌یه‌ندراون.

 

ده‌رون عومه‌ر، به‌ڕێوبه‌رى گشتى چاودێرى و گه‌شه‌پێدانى كۆمه‌ڵایه‌تى گه‌رمیان، له‌مباره‌یه‌وه‌ به‌ رادیۆى ده‌نگى راگه‌یاند: "ئێمه‌ له‌ رێگه‌ى راگه‌یه‌ندراو و ده‌زگاكانى راگه‌یاندنه‌وه‌ هه‌وڵى هۆشیاركردنه‌وه‌ى خاوه‌ن پێداویستیه‌كانمان داوه‌، هاوكات سكاڵاى یاسایشمان تۆماركرده‌ له‌ به‌ڕێوبه‌رایه‌تى پۆلیسى گه‌رمیان و ئاسایشى گه‌رمیان بۆ ئه‌و مه‌به‌سته‌".

 

هێماى بۆ ئه‌وه‌شكرد: تاوه‌كو ئێستا له‌ گه‌رمیان كه‌س له‌سه‌ر ئه‌و بابه‌ته‌ ده‌ستگیرنه‌كراوه‌، به‌ڵام له‌ سلێمانى باندێكى 4 كه‌سى ده‌ستگیركران كه‌  په‌یوه‌ندیان به‌ خاوه‌ن پێداویستى گه‌رمیانیشه‌وه‌ كردبو.