ده‌نگ نێت

 

نزیکەی ساڵێکە لیژنەیەک بۆ رێکخستنەوەی بەنزینخانە بێ مۆڵەتەکانی سنوری گەرمیان پێکهێنراوه‌، به‌ڵام تا ئێستا نه‌توانراوه‌ بڕیاره‌كانى لیژنه‌كه‌ جێبه‌جێ بكرێت.

 

بەنزینخانەکانی سنوری گەرمیان ٧٠ بەنزینخانەن و تەنها ١٦ بەنزینخانەیان مۆڵەتیان هەیە، بۆ رێکخستنەوەشیان لیژنەیەکی تایبەت بەو مەبەستە دروست کرابو، بەڵام دوای تێپەڕینی نزیکه‌ی ساڵێک هیچ رێکخستنەوەیەکیان بۆ نەکراوە.

 

بەڕێوبەری نەوت و کانزاکانی گەرمیان باس له‌وه‌ده‌كات سکاڵامان لەسەر تۆمار کردون چاوەڕێی بڕیاری دادگاین لەو بارەیەوە.

 

یادگار فه‌تاح، بەڕێوبەری نەوت و کانزاکانی گەرمیان به‌رادیۆى ده‌نگى راگه‌یاند: لە دادگا سكاڵامان له‌سه‌ر به‌نزینخانه‌ بێ مۆڵه‌ته‌كان تۆماركردوه‌ کە ٥٤ بەنزینخانەیە.

 

وتیشى: هەمو پێشنیارێک کە لە پێشودا هەبووە لەسه‌ر کەمکردنەوەی ژمارەیان بۆ نیوە رەت دەکەینەوە.

 

بەڕێوبەری نەوت و کانزاکانی گەرمیان، ئاماژه‌ى به‌وه‌شكرد: ماوەی چەند مانگێکە ئەو دۆسیەیە لە دادگایە و هەر بڕیارێک لەو  بارەیەوە بدرێت پێوەی پابەند دەبین.