دەنگ نێت

 

عوسمانی حاجی مەحمود رایدەگەیەنێت حزبی رانەگەیاندوە وەک باس دەکرێت، دەشڵێت: ماڵپەڕ و پەیجێکیان بەناوی 'متمانە نێت'ـەوە دروستکردوە.

 

لە رونکردنەوەیەکدا کە وێنەی بۆ دەنگ نێت ھاتوە، عوسمانی حاجی مەحمود، سیاسەتوانی سەربەخۆی کوردستان، دەڵێت: 'لەهەندێك دەزگای راگەیاندن وا باس دەکرێ كە ئێمە لەگەڵ كۆمەڵێك لە هاورێ و دۆستان و خەمخۆرانی گەلەكەمان حزبێکی سیاسیمان راگەیاندوە'.

 

رەدیشی دەکاتەوە ئەو ھەنگاوەیان نابێت، بەڵکو وەکوخۆی دەڵێت: لە 'گفتوگۆیەکی دورو درێژی دۆستانەی بەردەوام'دان بۆ 'چۆنێتی مامەڵە کردن لەگەڵ دۆخی خراپی کورستان و ژیانی خەڵک و دۆزینەوەی دەرەچەیەکی گونجاو'.

 

جەختیشدەکاتەوە: 'لەبارەی پێكهێنانی حزب یان ھەرفۆرمێکی تری سیاسیەوە ھیچ جۆرە بریارێك نەدراوە'.

 

لە چەند رۆژی رابردودا ماڵپەڕێک بەناوی (متمانە نێت)ـەوە راگەیەنرا، عوسمانی حاجی مەحمود ئاشکرای دەکات کە پرۆژەکە ھی ئەوانە و 'ئامانجەکەی خزمەتی خەڵک و ئەو ئاراستەو بیرکردەوانەیە کە لە خەمی دۆزینەوەو بنیاتنانی ھیواو ئومێدن بۆ ئایندەی گەلەکەمان'.