سەرچاوەیەکی ئاگادار لە خانەقی بە دەنگ نێتی وت: ئەمڕۆ دوشەمە کەسوکاری ھاوڵاتیەک کە لەلایەن ئاسایشەوە دەستگیرکراوە، ھەڵیانکوتاوەتە سەر بینای ئاسایشی یەکێتی لە خانەقی و دروشمیان لەسەر دیوار و دەرگای بیناکە نوسیوە و داوای ئازادکردنی و ھەروەھا دەرکردنی ھێزەکانی ئاسایشیان کردوە.

 

وتیشی: بەوھۆیەوە ئاڵۆزیی دروستبوە و چەکدارانی ئاسایش کشاونەتەوە لە خاڵە جیاوازەکان بۆ ناو بارەگاکەیان.

 

بە گوێرەی ڤیدیۆیەکیش کە دەست دەنگ نێت کەوتوە، ئەوانەی چونەتە سەر بارەگای ئاسایش، کەسانی مەدەنین و داوای ئازادکردنی گیراوێکیان دەکەن بەناوی سالار، بە ھوتافکێشان و داواکاری ئازادکردنی دەچنە ناو بیناکەوە و چەکداران و بەرپرسانی ئاسایشیش ھەوڵی ھێورکردنەوەیان دەدەن و دەڵێن ئازادکردنی بەدەست ئێمە نیە.

 

ھاوکات سەرچاوەیەکی دیکەی ئاگادار ئاماژەی بەوەدا، کێشەکە لە روداوی دەستگیرکردنی ھاوڵاتیەکی ترەوە دروستبوە کە بازرگانە و پێشتر ئەندامی یەکێتی بوە و دواتر وەلائی بۆ حەشد و بەتایبەتی ھێزەکانی بەدر دەربڕیوە و باس لەوە دەکرێت کە بەرژەوەندی بازرگانی ھەیە لەگەڵیان، دوێنێ لەکاتی چونی بۆ سلێمانی، لە رێگا لەلایەن ئاسایشەوە دەستگیرکراوە، دواتر بە فشاری ھێزەکانی حەشد بەردراوە، دواتر بە کەژاوەوە ھاتوەتە خانەقینەوە و دروشمی دژ بە ئاسایشیان وتوەتەوە.