دەنگ نێت

 

٦١ دادوەر و ئەندامی داواکاری گشتی ھەرێم، داوای کۆتاییھێنان بەلێبڕینی موچە دەکەن و دەڵێن پاساو نەماوە بۆ ئەو کارە، داواش دەکەن دەستی حزب لە کایەی دادوەریی دوربخرێتەوە.

 

لەبەیاننامەیەکدا کە ئەمڕۆ بڵاویان کردوەتەوە، ئەو ٦١ دادوەرە باس لەوەدەکەن کە حکومەت دەبێت چاکسازی بکات و کۆتایی بە دیاردەی بونی دوموچە و سێ موچە بھێنێت نەک دەست بۆ موچەی شایستەی فەرمانبەران ببات.

 

ھەروەک داواش دەکەن کۆتایی بە لێبڕینی موچە بھێنرێت، پێیان وایە بەرزبونەوەی نرخی نەوت بۆ سەروی ٦٥$ بۆ یەک بەرمیل، پاساوی ئەنجامدانی ئەو لێبڕینە ناھێڵێت.

 

بەتایبەتیش دژی ئەوە دەوەستنەوە کە موچەی دادوەران بە رێژەی ٥٠٪‏ کەم بکرێتەوە.

 

لە بەشێکی تری بەیاننامەکەدا، جەخت کراوەتەوە لە پێویستی سەربەخۆ بونی دەسەڵاتی دادوەریی و دورخستنەوەی دەستی حزب و دەستوەردانی حزبی و رێزگرتن لە سەروەریی یاسا و دەسەڵاتی دادوەریی.