دەنگ نێت

 

ئه‌مرۆ ده‌ ساڵ به‌سه‌ر خۆپیشاندانه‌كانى 25ى شوباتى ساڵى 2011 تێده‌په‌رێت و تا ئێستا ئه‌و كه‌سانه‌ى تۆمه‌تبارن به‌ كوشتن و برینداركردنى هاوڵاتیانى كه‌لار لە خۆپیشاندانەکە، ده‌ستگیر نه‌كراون و نه‌ڕۆشتونەته‌ به‌رده‌م دادگا.

 

له‌ 25ى شوباتى ساڵى 2011، خۆپیشاندان له‌ كه‌لار ئه‌نجامدرا و خۆپیشانده‌ران چونه‌ به‌رده‌م باره‌گاى لقى ٢٢ی گەرمیانی پارتى دیموکراتی کوردستان و به‌ هۆى ته‌قه‌ى هێزه‌ ئه‌منیه‌كانه‌وه‌ دو هاوڵاتى بەناوەکانی: (بیلال ئەحمەد و محەمەد رەشید)ـەوە شه‌هید بون و ژماره‌یه‌ک ھاوڵاتی تریش بریندار بون.

 

ھەر دوای روداوەکەش، سکاڵا لەسەر کۆمەڵێک کەس بە تۆمەتی تەقەکردن و کوشتنی خۆپیشاندەران تۆمارکرا.

 

پاش تێپه‌رینى ده‌ ساڵ به‌سه‌ر خۆپیشاندانه‌كه‌دا، تا ئێستا ئه‌و كه‌سانه‌ى تۆمه‌تبارن له‌ دۆسیه‌ى ته‌قه‌كردن له‌ خۆپیشانده‌ران كه‌ له‌ نێویاندا به‌رپرسى لقى گەرمیانی پارتى هه‌یه‌، نه‌چونه‌ته‌ به‌رده‌م دادگا و ئه‌و دۆسیه‌یه‌ یه‌كلا نه‌كراوه‌ته‌وه‌.

 

ھاوکات ئەمڕۆ و بۆ یادکردنەوەی ئەو روداوە، ژمارەیەک چالاکوان چونە سەر گۆڕی (بیلال ئەحمەد) یەکێک لە شەھیدانی خۆپیشاندانەکە و چەپکە گوڵیان لەسەر گوڵکۆکەی دانا و پۆستەری یادکردنەوەی ئەو قوربانیەیان ھەڵکرد.