ده‌نگ نێت

 

به‌ڕێوبه‌رى گومركی گه‌رمیان ده‌ڵێت ئه‌گه‌ر كێشه‌كانیان له‌گه‌ڵ دادگاى قۆره‌تو چاره‌سه‌ر نه‌كه‌ن، ده‌ست له‌كارده‌كێشێته‌وه‌.

 

حسێن ئه‌حمه‌د، له‌ لێدوانێكى تایبه‌ت بۆ رادیۆی ده‌نگ وتى: به‌ زاره‌كى داواكاریه‌كه‌م ئاراسته‌ى وه‌زاره‌تى دارایی كردوه‌ و له‌م هه‌فته‌یه‌شدا به‌ فه‌رمی پێیان ده‌گه‌یه‌نم، تیایدا داواى ئه‌وه‌ ده‌كه‌م كه‌ كێشه‌ى لێكتێنه‌گه‌یشتنمان له‌گه‌ڵ دادگاى قۆره‌تو چاره‌سه‌ر بكه‌ن.

 

ئاماژه‌ى به‌وه‌شكرد كه‌ ئه‌گه‌ر ئه‌و كێشانه‌ چاره‌سه‌ر نه‌كرێت، ئه‌وا ده‌ستله‌كارده‌كێشێته‌وه‌.

 

ئه‌م قسانه‌ى به‌ڕێوبه‌رى گومركی گه‌رمیان، پاش نزیكه‌ى هه‌فته‌یه‌ك له‌ راگرتنى خۆی و به‌ڕێوبه‌رى ده‌روازه‌ى نێوده‌وڵه‌تى په‌روێزخان هات به‌ فه‌رمانى دادگاى قۆره‌تو له‌سه‌ر دۆسیه‌یه‌ك كه‌ تیایدا تۆمه‌تبار كرابون به‌ رێگه‌دان به‌ هاتنى بار به‌ بێ رێكارى یاسایی له‌ مه‌رزی په‌روێزخانه‌وه‌.

 

دواى ئازادكردنی، هه‌واڵی ئه‌وه‌ بڵاوبویه‌وه‌ كه‌ به‌ڕێوبه‌رى گومركی گه‌رمیان رایگه‌یاندوه‌ ئه‌مڕۆ دوا رۆژى ده‌وامى ده‌بێت و ده‌ستبه‌ردارى پۆسته‌كه‌ى بوه‌، به‌ڵام حسێن ئه‌حمه‌د ئاماژه‌ى به‌وه‌كرد كه‌ هێشتا ده‌ستبه‌ردارى پۆسته‌كه‌ى نه‌بوه‌ و سه‌ردانى وه‌زاره‌ت ده‌كات و داواى دروستكردنى لێكتێگه‌یشتنیان لێده‌كات له‌گه‌ڵ دادگاى قۆره‌تو.