دەنگ نێت

 

یه‌كێتى و گۆڕان له‌سه‌ر ئاڵوگۆڕكردنى به‌شێك له‌ پۆسته‌كانى گه‌رمیان رێككه‌وتون،  وته‌بێژى مه‌كۆى كه‌لارى گۆڕانیش ده‌ڵێت: یه‌كێتى چاوه‌ڕوانى ئێمه‌یه‌ ناوه‌كانیان راده‌ست بكه‌ین.

 

پێشتر بزوتنه‌وه‌ى گۆڕان چه‌ند جارێك پلانى گۆڕانكارى له‌ به‌ركه‌وته‌كانى خۆی له‌ حكومه‌تى خۆجێی سنورى سلێمانى و گه‌رمیان دانا و بڕیاربو گۆڕانكارى ئه‌نجام بدات، به‌ڵام تا ئێستا ئه‌و گۆڕانكارییانه‌ ئه‌نجام نه‌دراون.

 

ساڵح میروه‌یس، وته‌بێژى مه‌كۆى كه‌لارى بزوتنه‌وه‌ى گۆڕان، به‌ رادیۆى ده‌نگى راگه‌یاند: گۆڕانكارى له‌ پۆسته‌كان ئه‌نجام ده‌ده‌ین و له‌ ئاستى باڵاش چه‌ند جارێك له‌گه‌ڵ یه‌كێتى نیشتیمانى دانیشتون بۆ تاوتوێکردنی ئەو مەبەستە.

 

ئاماژه‌ى به‌وه‌شكرد: بڕیاردراوه‌ ئه‌و پۆستانه‌ى كه‌ پشكى بزوتنه‌وه‌ى گۆڕان بون و ماوه‌ى چه‌ند ساڵێكه‌ لای یه‌كێتین، بدرێنه‌وه‌ به‌ گۆڕان.

 

ئەو پۆستانەی گۆڕان داوایان دەکات، بریتین لە: جێگری سەرپەرشتیاری ئیدارەی گەرمیان، بەڕێوبەری گشتی پەروەردەی گەرمیان و بەڕێوبەری پۆلیسی گەرمیان.

 

ساڵەح میروەیس، لەبارەی وردەکاریی رادەستکردنەوەی ئەو پۆستانەوە وتى: یه‌كێتى چاوه‌ڕوانى ئێمەیە‌ ناوى كاندیده‌كانیان بۆ بنێرین.

 

لە سنوری ئیدارەی گەرمیان، بزوتنەوەی گۆڕان ئەم پۆستانەی هەیە: ٣ پۆستی بەڕێوبەری گشتی (تەندروستی، کاروکاروباری کۆمەڵایەتی و کشتوکاڵ)، قایمقامی کەلار، بەڕێوبەری دەروازەی پەروێزخان و ٢ بەڕێوبەری ناحیە (شێخ تەویل و سەرقەڵا).