نزیكەی ٥ مانگە بڕیار دراوە ٢٠٠ هێڵی نوێ بدرێتە شۆفێران بۆ پرۆژە نوێیەكانی نیشتەجێبون، بەڵام هێشتا نەدراوە، بەڕێوبەری گواستنەوەی گەرمیانیش دەڵێت: لە چاوەڕوانی پێكهێنانی لیژنەیەکین.

لە سەرەتای ئەمساڵەوە بڕیاردرا بە پێدانی ٢٠٠ هێڵی نوێ بە شۆفێرانی مینی پاس بۆ ئەو پڕۆژە نیشتەجێبونانەی كە تازە تەواوبون و هاوڵاتی زۆریان تێدا نیشتەجێیە.

لەمبارەیەوە، ئیدریس مستەفا، بەڕێوبەری بەڕێوبەرایەتی گواستنەوەی گەرمیان، بۆ رادیۆی دەنگ وتی:  ماوەی ٥ مانگە سەرقاڵی كارەكانی ئەو ٢٠٠ هێڵەین و لە ئێستادا نوسراومان كردوە بۆ قایمقامیەت بۆ دیاریكردنی ئەندامانی لیژنەی دابەشکردن و لە چاوەڕوانی پێكهێنانی لیژنەكەدا ماوینەتەوە.

وتیشی: کە لیژنەکە پێكهێنرا، هێڵەكان بەپێی مەرجەكان دابەشدەكرێت بەسەر شۆفێراندا.

ئاماژەی بەوەشدا مەرجی وەرگرتنی هێڵەكان ئەوەیە مینی پاسەکان مۆدێلیان کۆن نەبێت و ژمارەی تابلۆكەشیان سلێمانی بێت.