رادیۆی دەنگ

ئەگەرچی وابڕیاربو لەم هەفتەیەدا دەست بە دابەشکردنی موچەی مامۆستایانی گرێبەست بکرێت، بەڵام نەکرا، پەروەردەی گەرمیانیش دەڵێت: بۆ ئێمەش رون نیە کەی دەست بە دابەشکردنی دەکرێت.

ئەرسەلان پەرۆش، بەرپرسی راگەیاندنی بەڕێوەبەرایەتی گشتی پەروەردەی گەرمیان، بۆ رادیۆی دەنگ وتی: موچەی مامۆستایانی گرێبەست لەسەر داهاتی ناوخۆیە، پێمان وترا لەم هەفتەیە دابەش دەکرێت، بەڵام نەکرا.

دەشڵێت: بۆ ئێمەش رون نیە کەی دەست بە دابەشکردنی دەکرێت، رەنگە ئەم هەفتەیە بێت یان رەنگە هەفتەی داهاتو.

ئەمەش لەکاتێکدایە کە فەرمانبەرانی هەمیشەیی و گرێبەستی هەرێم، لە سەروبەندی جەژنی قوربان موچەی مانگی ئایاریان وەرگرت.