زانکۆی گەرمیان، لە پاش دامەزراندنی وەک زانکۆیەکی سەربەخۆ لە ساڵی (٢٠١٠)دا، دوای ئەوەی پێشتر بەشێک بوو لە زانکۆی سلێمانی، قۆناغی جیاوازی لە گەشەکردن بەخۆوە بینیوە. بەڵام بۆ ئەوەی هەر دامەزراوەیەکی ئەکادیمی بتوانێت لەگەڵ پێشکەوتنە خێراکانی سەردەمدا هەنگاو بنێت، پێویستی بە بەردەوامی لە نوێبوونەوە و گۆڕانکاری هەیە. یەکێک لە سەرەکیترین کایەکانیش کە پێویستی بەم نوێبوونەوەیە هەیە، پرسی ئاڵوگۆڕی پۆستە کارگێڕی و ئەکادیمییە باڵاکانی زانکۆیە.

لێرەدا تیشک دەخەینە سەر گرنگترین ئەو هۆکارە ئەکادیمییانەی کە وا دەکەن گۆڕانکاری لە پۆستەکانی زانکۆی گەرمیاندا ببێتە پێویستییەکی هەنوکەیی:

۱ـ لە ڕووی زانستی و بەڕێوەبردنەوە، مرۆڤ لە چوار ساڵی یەکەمی وەرگرتنی بەرپرسیارێتییەکدا، لوتکەی وزە و بیرۆکە نوێیەکانی خۆی پێشکەش و جێبەجێ دەکات. مانەوەی کەسانێک بۆ ماوەیەکی درێژخایەن و چەندین ساڵ لە پۆستە باڵاکاندا، دەبێتە هۆی تووشبوون بە چەقبەستوویی کارگێڕی. کاتێک بیرکردنەوە و شێوازی بەڕێوەبردن دووبارە دەبێتەوە، زانکۆ توانای نوێبوونەوەی نامێنێت و لە گەشەکردن دەوەستێت.

۲ـ زانکۆی گەرمیان لە ئێستادا خاوەنی کەسایەتیی زانستی و ئەکادیمیی زۆر کارامەیە، کە بەشێکیان بڕوانامەی باڵا (دکتۆرا)یان لە زانکۆ پێشکەوتووەکانی جیهاندا بەدەستهێناوە. ئەم پسپۆڕانە ئاشنای سیستەمە نوێیەکانی خوێندن و توێژینەوەی زانستی ئاستبەرز و نێودەوڵەتین؛ بۆیە بێبەشکردنی زانکۆ لەم توانایانە و نەدانی دەرفەت پێیان، بەفیڕۆدانی سامانێکی مرۆیی گەورەیە.

۳ـ پێدانی دەرفەت بەم کەسە ئەکادیمی و پسپۆڕە نوێیانە، ڕۆحیەتێکی پڕ لە وزە و گڕوتین بە جەستەی زانکۆ دەبەخشێت، ئەمەش دەبێتە هۆی:

- پەرەپێدانی پڕۆگرامەکانی خوێندن بەپێی پێوەرە جیهانییەکان.

- چالاککردنی زیاتری سێکتەری توێژینەوەی زانستی.

- دروستکردنی پەیوەندیی ئەکادیمیی بەهێز لەگەڵ زانکۆکانی دەرەوە.

زانکۆکان ناوەندی بەرهەمهێنانی زانست و نوێگەرین، ناگونجێت خۆیان لە ناوەوەدا تووشی چەقبەستوویی ببن.

بۆ ئەوەی زانکۆی گەرمیان پێگەی شایستەی خۆی لەسەر نەخشەی ئەکادیمیی هەرێم و جیهاندا پتەو بکات، پێویستە بازنەی دەستاودەستکردنی دەسەڵات و پۆستەکان چالاک بکرێت. ڕێگەدان بە تێکەڵبوونی ئەزموونی ڕابردوو لەگەڵ وزە و بیرۆکە نوێیەکانی نەوەی نوێی ئەکادیمیستان، تەنها ڕێگەیە بۆ گەرەنتیکردنی پاشەڕۆژێکی گەشتر بۆ ئەم دامەزراوە ئازیزە.

تێبینی// گرنگە گۆڕانکاری لە پۆستەکاندا لەسەر بنەمای: توانای ئەکادیمی، کارگێڕی، بوونی توێژینەوەی زانستی، و کەسایەتی بەهیز و لێهاتوو بێت.