د. چیا محەمەد، سەرۆکی زانکۆی پۆلیتەکنیکی گەرمیان، بە رادیۆی دەنگی راگەیاند، تا ئێستا رەزامەندی بۆ تەندەرینی ئەو پێنج کۆلێژ و پەیمانگایەی کە بڕیاربو بینایان بۆ دروست بکرێت نەگەڕاوەتەوە، پرۆسەکەش بۆ ساڵی ٢٠٢٦ دواکەوتوە.

سەرۆکی زانکۆ هۆکاری ئەم کێشەیەی گەڕاندەوە بۆ بەردەوامیی قەیرانی دارایی کە بوەتە هۆی ئەوەی ئەنجومەنی وەزیران رەزامەندییە کۆنەکان نوێنەکاتەوە.

ئەم پێنج بینایە وەک پێویستییەکی هەنوکەیی بۆ زانکۆکە دەبینران تاوەکو بتوانن لە ساڵانی داهاتودا خوێندکاری زیاتر وەربگرن و ژینگەیەکی زانستی گونجاو دابین بکەن.

زانکۆی پۆلیتەکنیکی گەرمیان کە دووم زانکۆی ناوچەکەیە، یەکێک لە کێشە گەورەکانی بەردەمی بریتییە لە نەبون و کەمی بینای خوێندن، بەشێوەیەک کۆلێجەکانی بەناچاریی لە بینای فەرمانگەکانی دیکەدا دەخوێنن.