موئه‌یه‌د ئه‌حمه‌د، به‌ڕێوبه‌رى به‌ڕێوبه‌رایه‌تى ئاودێریی گه‌رمیان، بۆ رادیۆى ده‌نگ وتى: له‌ پرۆژه‌ى بەرەنگاربونەوەی مەترسییەکانی لافاو کە له‌ ئیداره‌ى گه‌رمیان ئامادەکراوە، پێشنیارى ئه‌وه‌مان كردوه‌ كه‌ پۆند له‌سه‌ر چه‌مه‌ وه‌رزییه‌كان دروستبكرێت بۆ ئه‌وه‌ى مه‌ترسى لافاو كه‌مبكرێته‌وه‌.

ده‌شڵێت: پێشنیارمان كردوه‌ له‌ سه‌ر چه‌مى گۆبان و سه‌یدخه‌لیل، دو پۆند دروستبكرێن كه‌ ئاوی ئەو دو چەمە دێته‌وه‌ بۆ نێوان گەڕەکی گۆران "گازینۆ" و بەردەسور لە کەلار.

ئاماژەی بەوەشدا پۆندێكی تریشیان له‌ قه‌زاى رزگارییە و هەر لەسەر رێڕەوی چەمە وەرزییەکانە کە لە زستان و بەهاردا لافاویان پێداتێدەپەڕێت.

هێماى بۆ ئه‌وه‌شكرد: گوژمه‌ى ئەو سێ پۆندە، 2 ملیار و 500 ملیۆن دینارە.

جه‌ختى له‌وه‌شكرده‌وه‌: ئه‌و پۆندانە کە پێشنیازکراوە دروستبکرێن، بۆ كۆگاكردنى ئاو نیه‌، به‌ڵكو ئه‌و ئاوه‌ى گلیدەداتەوە‌ دواى چه‌ند رۆژێك ده‌چێته‌وه‌ ژێرزه‌وى.

ئەمساڵ بارانێکی زۆر لە ناوچەی گەرمیان باری، بەڵام بەهۆی نەبونی هیچ بەنداو و پۆندێکەوە، نەتوانرا ئاوی پێویستی لێ گلبدرێتەوە. ئەمە سەرباری ئەوەی بارانبارینەکان چەندجارێک بون بە لافاو و مەترسییان لەسەر ئەو دو قەزایە دروستکرد.