رادیۆی دەنگ

بۆ ماوه‌ى چه‌ند رۆژێكه‌ ژینگه‌پارێزانى نه‌خۆشخانه‌ حكومیه‌كانى گه‌رمیان مانیان گرتوه‌، به‌ڕێوبه‌رى نه‌خۆخشانه‌ى فریاكه‌وتنى شه‌هید هه‌ژار له‌ كه‌لار ده‌ڵێت: هۆكاره‌كه‌ى ئه‌وه‌یه‌ بۆ ماوه‌ى 5 مانگه‌ موچیان وه‌رنه‌گرتوه‌.

ره‌فیق قادر، به‌ڕێوبه‌رى نه‌خۆشخانەى فریاكه‌وتنى شه‌هید هه‌ژار له‌ كه‌لار، بۆ رادیۆى ده‌نگ باسى له‌وه‌كرد: بۆ ماوه‌ى 5 مانگه‌ ژینگه‌پارێزانى نه‌خۆشخانەکانی گه‌رمیان موچه‌یان وه‌رنه‌گرتوه‌، ئه‌وانیش له‌ رۆژى هه‌ینیه‌وه‌ بایكۆتیان كردوه‌ و نه‌گه‌ڕاونه‌ته‌وه‌ سه‌ر كاره‌كه‌یان.

ده‌شڵێت: به‌شى گرێبه‌ستى به‌ڕێوبه‌رایه‌تیمان نوسراویان كردوه‌ بۆ وه‌زاره‌تى ته‌ندروستى كه‌ موچه‌ى ژینگه‌پارێزان راسته‌وخۆ بدرێت له‌ رێگه‌ى به‌ڕێوبه‌رایه‌تیه‌وه‌ و په‌یوه‌ندیان به‌ كۆمپانیاوه‌ نه‌مێنێت، بۆ ئه‌و مه‌به‌سته‌ش ئه‌نجومه‌نى وه‌زیران ره‌زامه‌ندى داوه‌ و نوسراو ئاسته‌ى وه‌زاره‌تى دارایی كراوه‌.

هێماى بۆئه‌وه‌شكرد: بڕیاره‌ له‌م هه‌فته‌یه‌دا وه‌ڵام بگه‌ڕێته‌وه‌، به‌ڵام 20 رۆژه‌ وائه‌ڵێن و تاوه‌كو ئێستا هیچ نه‌كراوه‌.

ئه‌مه‌ له‌ كاتێكدایه‌ کە بەهۆی بایکۆتی ژینگەپارێزانەوە نەخۆشخانەکانی سنورەکە روبەڕوی گرفتێکی گەورەی پاککردنەوە بون.