رادیۆی دەنگ

هاتوچۆی گەرمیان ئاشکرای دەکات كامێراكانی تۆمارکردنی تیژڕەویی "خاڵ بۆ خاڵ" لە رێگەی کەلار- کفری، بەشێوەیەکی ئەزمونی کەوتوەتەکار، لەبارەی وادەی کەوتنەکاری تەواوەتیشی رونکردنەوە دەدات.

سامان عەلی، وتەبێژی بەڕێوبەرایەتی هاتوچۆی گەرمیان، بە رادیۆی دەنگی وت: كارەكانی پرۆژەی كامێرای خاڵ بۆ خاڵ "پۆینت تو پۆینت" لە رێگای کەلار- کفری، لەڕوی دانانەوە هەموی تەواوبوە و بەشێوەیەکی ئەزمونییش خراوەتەکار.

وتیشی: ئەو خستنەکارە بەمەبەستی چێککردنەوەیەتی لەلایەن کۆمپانیاوە و بۆ دڵنیابونەوەیە لەوەی بەبێ کێشە کاردەکات و سەرپێچیی تۆماردەکات.

وتەبێژی هاتوچۆی گەرمیان ئاماژەی بەوەدا کە لە ئێستادا كۆمپانیای جێبەجێکار و سەرپەرشتیاری پرۆژەکە سەرقاڵی ئەوەیە ئەو سەرپێچیانەی تۆماردەكرێت بیخاتەسەر تابلۆی ئۆتۆمبێلەكان و راپۆرتی خۆیان رادەستی وەزارەت بكەن.

وتیشی: پاش پێشکەشکردنی راپۆرتەکە و وەرگرتنی رەزامەندیی لەلایەن وەزارەتەوە، كاركردنی كامێراكان بە فەرمی رادەگەیەنرێت.