لەگەڵ هاتنی وەرزی گەرما گرفتی كارپێنەكردنی فێنككەرەوەی ئەو ئۆتۆمبێلانە هەیە كە كاری گواستنەوەی دەرەوەی شار دەكەن، بەڕێوبەرایەتی گواستنەوەی گەرمیانیش جەختدەکاتەوە دەبێت كاری پێبكەن و بە پێچەوانەوە سزادەدرێن.

ئیدریس مستەفا، بەڕێوبەری بەڕێوبەرایەتی گواستنەوەی گەرمیان، بە رادیۆی دەنگی وت: هەمو ساڵێك پێش هاتنی وەرزی هاوین، هەمو ئەو ئۆتۆمبێلانەی هێڵی دەرەوەی شاریان هەیە دەنێردرێن بۆ مەرجی توندوتۆڵی و بۆ ئەوەی لەگەڵ دەستپێكی وەرزەكەدا فێنككەرەوە بۆ هاوڵاتیان كارپێبكەن.

وتیشی: هەر ئۆتۆمبێلێك كار بە فێنککەرەوە نەکات، لێپێچینەوەی لەگەڵدا دەکەن، لەمبارەشەوە داوای لە هاوڵاتیان کرد ئاگاداریان بکەنەوە لە هەر سەرپێچییەک.

بەڵام لەبارەی هێڵە ناوخۆییەکانەوە، دۆخەکە جیاوازە و تائێستا حکومەت نەیتوانیوە ئۆتۆمبیلەکان پابەند بکات بە کارپێکردنی فێنککەرەوە.