رادیۆی دەنگ

نه‌بونى تاقیگه‌ى تایبه‌ت به‌ پشكنیى DNA له‌ گه‌رمیان هۆكاره‌ بۆ دره‌نگ یه‌كلابونه‌وه‌ى ده‌رئه‌نجامى تاوانه‌كانى كوشتن، بەشی لێکۆڵینەوەی بەڵگەکانی تاوانى گەرمیانیش ده‌ڵێت: داوامان كردوه،‌ به‌ڵام تاوه‌كو ئێستا نه‌كراوه‌ته‌وه‌.

سۆران محەمەد، بەڕێوبەری بەشی لێکۆڵینەوەی بەڵگەکانی تاوانى گەرمیان، باس لە کەمی پێداویستیی لێکۆڵینەوەکان دەکات و دەڵێت: "پۆلیسی گەرمیان هێشتا نەگەیشتوەتە ئاستی پۆلیسی جیهانی لە روی تەکنەلۆژیاوە، لە گەرمیان تاقیگەی پشکنینی مۆبایل و DNAـمان نییە، دەبێت نمونه‌كان بنێرین بۆ سلێمانی یان هەولێر، ئەمەش کاتێکی زۆر ده‌بات".

وتیشی: پڕۆژەمان پێشکەشکرد وە بۆ کردنەوەی تاقیگە، چونکە گەرمیان ناوچەیەکی فراوانە، بەڵام تاقیگە پارەی زۆری دەوێت و هێشتا بۆمان نەکراوە.

باسى له‌وه‌شكرد: سه‌ره‌ڕای ئەو بەربەستانەش، تیمەکانی پۆلیس بەهۆی ئەزمونی زۆر و خولی پسپۆڕییەوە، شارەزایی تەواویان لە کۆکردنەوەی بەڵگەکان هەیە و هەوڵدەدەن لەڕێگەی لێکۆڵینەوەی زانستی و تەکنیکییەوە ئەو بەربەستانە تێپەڕێنن.

وتەکانی ئەم بەرپرسەی پۆلیس لەمیانی راپۆرتێکی یەکەی چاودێری حکومەتی خۆجێی گەرمیانی سەر بە رادیۆی دەنگ هات، کە تایبەت بو بە پرسی تاوان لەگەرمیان و هەوڵەکانی حکومەت بۆ بەرگرتن بە زیادبونی تاوان.