رادیۆی دەنگ

نرخی سەوزە و میوە و پێداویستییە خۆراكییەکان بەڕادەیەکی بەرچاو بەرزبوەتەوە، بەڕێوبەری چاودێریی بازرگانی گەرمیانیش گرێیدەداتەوە بە دو هۆکارەوە.

لە گەرمیان نرخی كیلۆیەك تەماتە گەیشتوەتە ٢ هەزار دینار، بەهەمانشێوە نرخی میوەش گران بوە، بۆنمونە نرخی كیلۆیەك مۆز گەیشتوەتە سەروی ٢ هەزار دینار.

لەمبارەیەوە، حیكمەت ئەحمەد، بەڕێوبەری بەڕێوبەرایەتی چاودێریی بازرگانی گەرمیان، بە رادیۆی دەنگی وت: "هۆكاری بەرزبونەوەی نرخی سەوزە و میوە بەمجۆرەیە: ئەو بەرهەم و پێداویستییە خۆراكیانەی كە پێشوتر لە ئێرانەوە دەهات ئێستا بە شێوەیەكی كەمتر دێت".

باسی لەوەشکرد: هاوکات بازرگانان بەهۆی دۆخی ئيرانەوە بارەکانیان لە شوێنی دیكەوە دەهێنن و لە گواستنەوەكەدا بەهۆی زیادبونی نرخی تێچو و سوتەمەنییەوە، پارەیەكی زیاتر وەردەگیرێت، ئەمەش نرخی شتومەكەكان زیاد دەكات.

وتیشی: لە كاتی پێگەشتنی بەرهەمی ناوخۆییدا بەرهەم زیاد دەكات و نرخەکانیش دادەبەزن.