رادیۆی دەنگ

به‌هؤى به‌رزبونه‌وه‌ى ئاستى ئاوى روبارى سیروان زیان به‌ پرۆژه‌ گه‌شتیارییه‌كانى سه‌ر روباره‌كه‌ كه‌وتوه‌، بەڕێوبەری گه‌شتوگوزارى گه‌رمیانیش ده‌ڵێت: زیانه‌كان خۆى له‌ 500 ملیۆن دیناردا ده‌بینێته‌وه‌.

هێرش فه‌یزوڵڵا، به‌ڕێوبه‌رى گشتى گه‌شتوگوزارى گه‌رمیان، بۆ رادیۆى ده‌نگ وتى: پرۆژه‌ گه‌شتیارییه‌كانى ژاڵه‌ناو و پرۆژه‌ى گه‌شتیارى قه‌ره‌چه‌م و باوه‌نور، بەهۆی بەرزبونەوەی ئاستی ئاوی روباری سیروانەوە زیانیان به‌ركه‌وتوه‌، به‌تایبه‌ت ئه‌وه‌ى باوه‌نور کە‌ %70ـى كه‌پره‌كانى ژێرئاو كه‌وتون.

وتیشى: 2 لیژنه‌مان پێكهێنا بۆ ئه‌وه‌ى خه‌مڵاندنى زیانه‌كان بكه‌ن، دانه‌یه‌كیان تایبه‌ت به‌ خۆمانه‌ كه‌ ئه‌ندازیاریی و هونه‌ریی بون، ئه‌وى دیكه‌شمان له‌گه‌ڵ لایه‌نه‌كان و ئیداره‌ى گه‌رمیان بوه‌ بۆ خه‌مڵاندنى زیانه‌ مادییه‌كان.

هێماى بۆ ئه‌وه‌شكرد: زیانه‌ مادیه‌كانمان خه‌مڵاندوه‌ كه‌ خۆى له‌ 500 ملیۆن دیناردا ده‌بینێته‌وه‌ و داوامانكردوه‌ خاوه‌ن پرۆژه‌كان قه‌ره‌بو بكرێنه‌وه‌.

جه‌ختى له‌وه‌شكرده‌وه‌: داواشمانكردوه‌ له‌ وه‌زاره‌تى دارایی و شاره‌وانى كه‌ لێخۆشبونى ساڵێكى باج و رسومات بۆ ئه‌و خاوه‌ن پرۆژانه‌ ده‌ربكرێت، به‌هۆى ئه‌و زیانانه‌ى كه‌ به‌ریان كه‌وتوه‌.