رادیۆی دەنگ

دو لە بانکە‌كانى گه‌رمیان تێكه‌ڵ ده‌كرێن و ده‌كرێن به‌ یه‌ك بانك، به‌ڕێوبه‌رى بانكى خانوبه‌رى گه‌رمیانیش ده‌ڵێت: بڕیارى وه‌زاره‌تى داراییه‌.

به‌پێى زانیارییه‌كانى رادیۆى ده‌نگ، هه‌ریه‌كه‌ له‌ بانكى خانوبه‌ره‌ى گه‌رمیان و بانكى كشتوكاڵیی گەرمیان، کراون به‌ یه‌ك بانك، بەناوی بانكه‌ پسپۆڕییه‌كانه‌.

نازم جاسم، به‌ڕێوبەر‌ى بانكى خانوبه‌ره‌ى گه‌رمیان، بۆ رادیۆى ده‌نگ باسى له‌وه‌كرد: تێكه‌ڵكردنى هه‌ریه‌ك له‌و بانكانه‌ بڕیارى وه‌زاره‌تى داراییه‌ له‌سه‌ر ئاستى هه‌رێم جێبه‌جێ كراوه‌ به‌ گه‌رمیانیشه‌وه‌.

وتیشى: ئه‌مرۆش لیژنه‌یه‌ك له‌ وه‌زاره‌ته‌وه‌ دێته‌ سنوره‌كه‌ به‌مه‌به‌ستى كردنه‌وه‌ و تێكه‌ڵكردنى ئه‌و بانكانه‌ به‌ فه‌رمى و چۆنیه‌تى راییكردنی مامه‌ڵه‌ى هاوڵاتیان.

ئەو دو بانکەی تێکەڵکراون، ماوەیەکە کارەکانیان سست بوە، بەوهۆیەی کارەکانیان پەیوەستە بە پێدانی قەرز و پێشینەی پرۆژەی کشتوکاڵیی و دروستکردنی خانو و یەکەی نیشتەجێبون، کە لەدوای دروستبونی قەیرانی داراییەوە پێدانی ئەو قەرز و پێشینانە راگیراوە.