رادیۆی دەنگ

بەهۆی بڕیارەکانی حکومەتی عێراقەوە، عەلوەی سەوزە و میوەی کەلار بە رادەیەکی زۆر کارەکانی سست بوە، بەڕێوبەری کشتوکاڵی گەرمیانیش دەڵێت: تەنها ٦ کەرت لە ئێستادا کاریان تێدا دەکرێت و ئەوانی تر داخراون.

شادییە حسێن، بەڕێوبەری گشتی کشتوکاڵی گەرمیان، بۆ رادیۆی دەنگ باسی لەوەکرد: لە کۆی ١١٦ کەرت "قاطع" لە عەلوەی کەلار کە خاوەندارێتییەکەیان دەگەڕێتەوە بۆ نزیکەی ٣٥٠ کاسبکار، ئێستا تەنها ٦ دانەیان کار دەکات و ئەوانی دیکە داخراون، ئەگەر دۆخەکەش بەمشێوەیە بێت ئەوە خراپتر دەبێت.

وتیشی: هۆکارەکەشی ئەوەیە حکومەتی عێراقی رێگە نادات هیچ بارێکی سەوزە و میوە لە هەرێمەوە بڕوات بۆ ناوەڕاست و خواروی عێراق.

پێشتر حکومەتی هەرێم و ناوەند رێککەوتبون کە بەڕێوبەرایەتییە گشتییەکانی کشتوکاڵ لە هەرێم، نوسراوی پشتگیریی لەو بارانە بکەن کە بەرهەمی ناوخۆن بۆ ئەوەی بەبێ کێشە لە هەرێمەوە ببرێنە ناوەڕاست و خواروی عێراق، بەڵام دواتر حکومەتی عێراقی ئاستەنگیی بۆ ئەم کارە دروستکرد بە بیانوی ئەوەی بارەکان لە بنەڕەتەوە ئێرانین و بەناوی خۆماڵییەوە دەکرێن.

بەڕێوبەری گشتی کشتوکاڵی گەرمیان ئاماژەی بەوەدا، دوای دروستکردنی ئەم ئاستەنگییە، ئێستا رۆژانە دەتوانن تەنها پشتگیریی بۆ ٥ تاوەکو ٦ بار بکەن.