رادیۆی دەنگ

ئامادەكارییەكان بۆ چاودێرییکردنی نرخ و كوالێتی كاڵا و شمەكەكان  لە بازاڕدا بۆ مانگی رەمەزان دەستیپێكردوە و چاودێری بازرگانی گەرمیانیش دەڵێت: سێ لیژنەمان تەرخان كردوە بۆ ئەو مەبەستە.

حیكمەت ئەحمەد، بەڕێوبەری بەڕێوبەرایەتی چاودێریی بازرگانی گەرمیان، بە رادیۆی دەنگی وت: سێ لیژنەما تایبەت كردوە بە چاودێرییكردنی نرخ و كوالێتی كاڵا و شمەكەكان لە بازاڕدا، كە بەیانیان و ئێواران و شەوانیش بەردەوام دەبن لە گەڕان و پشکنین و بەسەرکردنەوەکانیان.

وتیشی: هەر كەسێكیش سكاڵا بكات لە بارەی ناجێگیریی نرخی هەر شوێنێك، راستەوخۆ سەردانی دەكەین و لەحاڵەتی سەلماندنییدا روبەڕوی سزای دەکەینەوە.

لە بارەی گرانبونی نرخی گۆشتی سوریش لە بازاڕدا، حیكمەت ئەحمەد وتی: چەند هۆكارێكی هەیە ئەوانیش ئەو باجەیە كە حكومەتی عێراق خستویەتیە سەر هاوردەكردنی كەرەستە وكاڵا و لەوانەش گۆشت، لە هەمان كاتیشدا بەرزبونەوەی نرخی دۆلار كاریگەری كردوەتە سەر زیادبونی نرخەكەی، بە جۆرێك هەر کیلۆیەک گۆشت ٢ بۆ ٣ هەزار گرانتر بوە.