رادیۆی دەنگ

لەکاتێکدا بەفیڕۆدانی ئاو مەترسییەكی بەردەوامە لەسەر كەمبونەوەی ئاوی ژێرزەوی، بەڕێوبەرایەتی ئاوی دەوروبەری گەرمیان رایدەگەیەنێت چەندین كەسمان بەوهۆیەوە سزاداوە.

سالار عەزیز، وتەبێژی بەڕێوبەرایەتی ئاوی دەوروبەری گەرمیان، بە رادیۆی دەنگی وت: بەفیڕۆدانی ئاو لەلایەن هاوڵاتیانەوە بەردەوامی هەیە و لیژنەكانیشمان بەردەوامن لە چاودێریی و سزادانیان.

دەشڵێت: جۆرێكی بەفیڕۆدانەكە ئەوەیە چ هاوڵاتی و چ کۆمپانیا، ئاوی زیادەیان بە نایاسایی راكێشاوە، ئەمەش كاریکردوەتەسەر كەمبونەوەی ئاو.

دەربارەی رێکارەکانی لێپرسینەوە لە سەرپێچییەکان، وتەبێژی بەڕێوبەرایەتی ئاوی دەوروبەری گەرمیان وتی: چەندین هاوڵاتی و كۆمپانیامان لە ساڵی رابردودا سزاداوە، سزاکانیش بەپێی شێوازی بەفیڕۆدانی ئاو دەگۆڕێت كە خۆی دەبینێتەوە لە غەرامەی پارە بە بڕی جیاواز.