رادیۆی دەنگ

 

هاوکات بە خەرجنەکردنی موچەی مانگی ١ و فەوتانی ٢ موچەی ساڵی پار، جارێكى تر ناڕەزایەتی و هەوڵی بایكۆتكردنى ناوه‌نده‌كانى خوێندن لە گەرمیان سه‌ریهه‌ڵداوه‌ته‌وه‌.

 

هاشم ساڵح، مامۆستا لە قەزای کفری، بەرادیۆی دەنگی راگەیاند: ئەمڕۆ لەگەڵ بەشێک لە مامۆستایان، لەبەردەم پەروەردەی قەزاکە گردبوینەوە و بڕیارماندا لە هەفتەی داهاتوەوە ناڕەزایەتی دەرببڕین.

 

وتیشی: ناڕەزایەتییەکانمان خۆیدەبینێتەوە لە بایکۆتکردنی هۆڵەکانی خوێندن، لەگەڵ خۆپیشاندان و گردبونەوەدا. 

 

لایخۆشییەوە، نه‌به‌رد ئه‌حمه‌د، ئه‌ندامى ئه‌نجومه‌نى مامۆستایانى ناڕازیی له‌ گه‌رمیان، بۆ رادیۆى ده‌نگ وتى: ئه‌نجومه‌نى سه‌رتاسه‌رى مامۆستایانى ناڕازیی، له‌ یه‌ك دو رۆژى داهاتودا قسه‌ى خۆیان ده‌بێت. 

 

وتیشی: مامۆستایان خۆیان بڕیارده‌ده‌ن بایكۆتى هۆڵه‌كانى خوێندن بكه‌ن یان نا، ئه‌نجومه‌نه‌كه‌ به‌ناوى ئه‌وانه‌وه‌ بڕیارنادات.

 

سەرهەڵدانەوەی ئەم جموجۆڵانە هاوکاتە بە نەبونی هیچ هەواڵێک لەبارەی خەرجکردنی موچەی مانگی ١ـی ئەمساڵ و فەوتانی ٢ موچەی ساڵی پار.