رادیۆی دەنگ

 

كاركردن له‌ رێگاى ساڵح ئاغا به‌شێوه‌یه‌كى پچڕپچڕ و خاو ده‌ڕوات ئه‌مه‌ش نیگه‌رانى لاى شۆفێران دروستكردوه‌، بەڕێوبەری رێگاوبانى گه‌رمیانیش ده‌ڵێت: هۆكاره‌كه‌ى خه‌رجنه‌كردنى بودجه‌یه‌ بۆى.

 

عه‌دنان خه‌لیل، به‌ڕێوبه‌رى به‌ڕێوبه‌رایه‌تى رێگاوبانى گه‌رمیان بۆ رادیۆى ده‌نگ باسى له‌وه‌كرد: كاركردن له‌و پرۆژه‌یه‌ به‌رده‌وامى هه‌یه‌، به‌ڵام به‌شێوه‌كى سست و پچڕپچڕ به‌ڕێوه‌ ده‌چێت، هۆكاره‌كه‌شى خه‌رجنه‌كردنى پاره‌یه‌ بۆ پرۆژه‌كه‌.

 

وتیشى: ئه‌و پرۆژه‌یه‌ دو بەشە‌،‌ به‌شێكیان له‌ بازگه‌كه‌وه‌ ده‌ستپێده‌كات و چه‌ند سه‌د مه‌ترێكه‌، به‌شه‌كه‌ى تریشى له‌ ساڵح ئاغا بۆ بازگه‌كه‌یه‌، به‌ هه‌ردوكیانه‌وه‌ نزیكه‌ى 1 كیلۆ و 400 مه‌تره‌.

 

ده‌شڵێت: گوژه‌ى ئه‌م پرۆژه‌یه‌ش نزیكه‌ى 1 ملیار و 400 ملیۆن دیناره‌، ئه‌وه‌ى كه‌ هه‌یه‌ تاوه‌كو ئێستا به‌ڵێنده‌ر هیچ بڕه‌ پاره‌یه‌كیشى وه‌رنه‌گرتوه‌ و له‌ كاركردنیش هه‌ر به‌رده‌وامه‌.

 

له‌باره‌ى وادەی ته‌واوبونى پرۆژه‌كه‌وە، عه‌دنان خه‌لیل ده‌ڵێت: كه‌ بودجه‌ نه‌بو شتێك نامێنێته‌وه‌ به‌ ناوى ماوەی تەواوبونی پرۆژه‌، چونکە به‌گوێره‌ى خه‌رجكردنى پاره‌ پرۆژه‌ ته‌واو ده‌كرێت.