رادیۆی دەنگ

 

بەهۆی کێشەیەکی کۆمەڵایەتییەوە قوتابیانی گوندی خاڵەبەگی سەر بەقەزای کەلار ناگەڕێنەوە دەوام، بەڕێوبەری پەروەردەی کەلاریش وردەکاری بابەتەکە دەخاتەرو.

 

رۆژی ۱۹ـی ۱۲ـی ساڵی رابردو، بەهۆی کێشەیەکی کۆمەڵایەتییەوە لەنێوان ۲ خێزان لە گوندی خاڵەبەگی سەر بە قەزای کەلار، ٤ کەس کوژران و ٦ـی دیکەش برینداربون.

 

بەپێی بەدواداچونێکی رادیۆی دەنگ، قوتابخانەی گوندی خاڵەبەگ پێکهاتوە لە ۷ مامۆستاو ۷ قوتابی، ۳ لە قوتابییەکان نەهاتونەتەوە دەوام لەدوای ئەو کێشەیەی روی داوە، تەنها ٤ قوتابی لە قوتابخانەکە ماوەتەوە.

 

عەدالەت لەتیف، بەڕێوبەری پەروەردەی کەلار جەختی لە بابەتەکە کردەوە و بۆ رادیۆی دەنگ وتی: وەکو رەسمی دانەخراوە، بەڵام قوتابی لێنەماوە، چونکە بەشێک لە قوتابییەکان سەر بەو خێزانانەن کە لەنێو ئەو کێشە کۆمەڵایەتییەدا بون.

 

وتیشی: دوای ئەوەی ئەو ۳ قوتابییە نەهاتنەوە بۆ دەوام، قوتابییەکانی دیکە داوای گوستنەوەیان کردوە بۆ قوتابخانەی گوندی "چەمە بیسمیلا".

 

دەشڵێت: مامۆستاکانی قوتابخانەکەش بەپێی پێویستی و بەشێوەیەکی کاتی دەخرێنە قوتابخانەکانی دیکەوە، تاوەکو بزانین ساڵی ئایندە چارەنوسی قوتابخانەکە چی لێدێت.