رادیۆی دەنگ

 

سەرۆکی لیژنە هاوبەشەکانی قایمقامیەتی قەزای کەلار ئاشکرای دەکات لەماوەی ساڵی ٢٠٢٥ـدا، لیژنەکانیان زیاتر لە دو هەزار دەرچونیان بۆ شوێنکار و دوکانەکان کردوە و دەستیان بەسەر ٥٤ تەن خۆراک و کەرەستەی خراپبودا گرتوە.

 

ئەفراسیاو مەحمود، بۆ رادیۆی دەنگ رایگەیاند: لە ماوەی ساڵی ٢٠٢٥ـدا، لیژنەکانمان ٢ هەزار و ٣٦٨ دەرچونیان ئەنجامداوە و تێیدا پشکنینیان بۆ زیاتر لە ١٩ هەزار شوێن و جێگا کردوە.

 

ئاماژەی بەوەشکرد، بەهۆی پابەند نەبون بە رێنماییەکان، ٤٧٩ شوێن غەرامە کراون. 

 

سەبارەت بە قەبارەی کەرەستە دەستبەسەرداگیراوەکانیش، ئەفراسیاو مەحمود رونیکردەوە: لیژنەکان دەستیان گرتوە بەسەر زیاتر لە ٢٣ تەن کەرەستەی خراپ و ماوەبەسەرچودا، هەروەها لەلایەن ئەوان و لیژنەی تایبەت بە چاودێریی دەرمانخانەكانیشەوە دەستگیراوە بەسەر ٣١ تەن دەرمان و کەرەستەی ماوەبەسەرچو.

 

ئاماژەی بەوەشکرد لە چوارچێوەی هەماهەنگیی کاسبکاران و خاوەن کۆگا و دەرمانخانەکان لەگەڵ لیژنەکاندا، ١٠٠ تەن مەوادی خراپبوو لەلایەن خاوەن دوکان و کۆگاکانەوە ڕادەستی لیژنەکان کراون، بەمەبەستی تەلەفکردن و لەناوبردنیان.