رادیۆی دەنگ

 

لەماوەی مانگێکدا فەرمانگەی میدیا و زانیاریی حکومەتی هەرێم ٣ پۆستی لەسەر بەنداو و پۆندەکانی گەرمیان کردوە، ئەمەش هاوکاتە بەو رەخنانەی کە لێی دەگیرێت بەوەی لە سنوری هەولێر بەنداو و پۆندی زیاتر دروستدەکات هەتا سنوری گەرمیان و سلێمانی.

 

بەپێی بەدواداچونەکانی رادیۆی دەنگ، فەرمانگەی میدیا و زانیاریی، ئەمڕۆ ٧ـی کانونی دوەم، پۆستێکی لەبارەی پۆندی سەرقزڵ لە گەرمیان کردوە، رۆژی ٣٠ و رۆژی  ١٨ـی کانونی یەکەمی ٢٠٢٥ـیش، دو پۆستی تری لەسەر بەنداوەکانی باوەنور و باوەشاسوار لە گەرمیان کردبو.

 

لەبەرامبەریشدا لەم ماوەیەدا دو پۆستی لەسەر بەنداوەکانی سنوری هەولێر کردوە.

 

ئەم پۆستانە هاوکاتە بەو رەخنانەی کە لە حکومەتی هەرێم دەگیرێت بەوەی لە دروستکردنی بەنداو و پۆنددا گرنگی زیاتر بە سنوری هەولێر دەدات، بەشێوەیەک لەو پارێزگایەدا لە ساڵی ٢٠٢٣ـوە ١٨ پرۆژەی بەنداو و پۆند بڕیاریان لێدراوە و بەشێکی بەرچاویان تەواو بون، لەکاتێکدا لە گەرمیان بەنداوی باوەنور نزیکەی ١٠ ساڵە تەواو نەکراوە و پۆند و بەنداوەکانی تریش بەهەمانشێوە بەهۆی قەیرانی دارایی و نەختینەوە یان لەکار وەستاون، یاخود تەواونەکراون.