رادیۆی دەنگ

 

دوای ئەوەی كاسبكار و بەقاڵەكانی رزگاریی بەهۆی گواستنەوەی بۆ جێگایەكی نوێ گردبونەوە و ناڕەزایەتییان دەربڕی، سەرۆكی شارەوانی قەزاكە دەڵێت: شوێنە کۆنەکەیان نەگونجاو بو.

 

هەفتەی رابردو، بەقاڵەكانی قەزای رزگاریی جێگاكەیان لە ناو بازاڕەوە گوازرایەوە بۆ گەراجێكی ئۆتۆمبێل كە چەندین ساڵە دروستكراوە و بەكارناهێنرێت، ئەمەش وایكرد ناڕەزایەتی دەرببڕن.

 

لەبارەی ئەو ناڕەزایەتییانەوە، ئەرسەلان ئەحمەد، سەرۆكی شارەوانی رزگاریی، بۆ رادیۆی دەنگ وتی: 15 رۆژ پێش ئەوەی بگوازرێنەوە، بەقاڵەکانمان ئاگاداركردونەتەوە، هاوکات جێگە تازەکەیان پاكوخاوێنە و جێگیرە و هیچ گرفتێكی نیە.

 

لەبارەی هۆکاری گواستنەوەیانەوە، وتی: هۆكاری گواستنەوەیان خراپی شوێنەكەیان بوە، چونكە شوێنەکەیان نەگونجاو بو و رێڕەوی لافاوە و هەمو ساڵێك گرفتمان بۆ دروستدەکات.

 

دەربارەی گلەیی بەقاڵەکان لە شوێنی راوەستانیان، سەرۆکی شارەوانی رزگاریی باسی لەوەكرد: دابەشكردنی شوێنەکانیان لە ناو گەراجەكەدا بە تیروپشك بوە، ناشگونجێت هەمویان لای دەرگاكەوە دابنێین.