رادیۆی دەنگ

 

قایمقامی قەزای کەلار ئاشکرای دەکات ئەوەی ئامادەکاریی و هەنگاوی پێویست بێت ناویانە بۆ روبەڕوبونەوەی لافاو، دەشڵێت: تیمەکانمان بەشێوەیەکی مەیدانی لەناو شاردان.

 

عارف عادل، بۆ رادیۆی دەنگ وتی: تیمەکانمان دابەشکردوە، رێرەوەکانی ئاومان پاککردوەتەوە، لەئێستادا لەناو شاردا لە گەڕانداین.

 

وتیشی: "ئەوەی لەتواناماندابێت چارەسەری دەکەین، ئەوی تریش لایخوایە و کارەساتی سروشتیش لەدەسەڵاتی مرۆڤدا نییە، بەڵام ئەوەی پێویستبوە کردومانە".

 

باسی لەوەشکرد ئاگاداری ئەو ئۆتۆمبێلانەمان کردوە کە لەناو چەم و دۆڵەکاندا بەجێیان هێشتوە، بۆ ئەوەی بێن ئۆتۆمبیلەکانیان دەربکەن.

 

بەوتەی قایمقامی کەلار، تاوەکو ئێستا مەترسی لەسەر شارەکە نییە، بەڵام ئەگەر باران زیاتر ببارێت ئەگەر هەیە ئاو کۆبێتەوە و گرفت دروست بکات.

 

لەبارەی ئەوەی بەهۆکاری ئەم شەپۆلەوە پشوی فەرمی رادەگەیەنرێت یان نا، قایمقامی قەزای کەلار دەڵێت: چاوەڕێین بزانین دۆخەکە چی لێدێت، لەکاتی پێویستدا کۆبونەوە دەکەین و بڕیارێک دەدەین لە سودی هاوڵاتیاندا بێت.