رادیۆی دەنگ

 

بەتەنیشت بانزینخانەیەکەوە لە کەلار، باڵەخانەیەک دروستدەکرێت کە شوقەی نیشتەجێبون و بازرگانی لەخۆ دەگرێت، بەڕێوبەرایەتی نه‌خشه‌دانانى گەرمیانیش ده‌ڵێت: هیچ شتێک نەکراوە بەپێچەوانەی یاسا و رێنماییەکانه‌وه‌.

 

بەپێی بەدواداچونێکی رادیۆی دەنگ، بە تەنیشت بەنزینخانەی راما‌وه‌ لە کەلار، مۆڵەت بە پرۆژەیەکی وەبەرهێنان دراوە بۆ دروستکردنی دو تاوەری بازرگانی و نیشتەجێبون.

 

پرۆژەکە کە دەکەوێتە سەر جادەی کەلار- کفری و نزیک بە بارەگای کۆمیتەی گەرمیانی حزبی شیوعییە، بە تەنیشت بەنزینخانەکەوەیە، لەکاتێکدا بەپێی یاسا و رێنماییەکان، دەبێت وێستگەکانی سوتەمەنی 50 مه‌تر لە شوێنی نیشتەجێبون و مانەوەی خەڵکییه‌وه‌ دوربن، ئه‌مه‌ش بۆ ئەوەی پارێزراو بن لە هەر مەترسییەک.

 

سامان مه‌حمود، بەڕێوبەری نەخشەدانانی ئاوەدانی گەرمیان، بۆ رادیۆی دەنگ وتی: بەپێی رێنماییەکان دەکرێت 50 مەتر لە شوێنی نیشتەجێبونەوە دوربێت، بەڵام ئەم 50 مەترە جێگیر نەکراوە و لە ئەگەری کەمتر لەوە، دەبێت دیوارێک بە بەرزی 6 مەتر بکرێت لەنێوان به‌نزینخانه‌كه‌ و شوێنى نیشته‌جێبونه‌كه‌.

 

وتیشی: دوای دیوارەکە داری چڕ هەبێت و پاشان سەوزایی و پاشان پرۆژە نیشتەجێبونەکە دروست بکرێت.

 

بەڵام بەپێی ئەو بەدواداچونەی رادیۆی دەنگ کردویەتی و بەگوێرەی ئەو وێنانەی لەبەردەستن، هەردو پرۆژەکە بەتەنیشت یەکەوەن بەبێ بونی هیچ ماوە و روبەرێک.

 

بەڕێوبەری نەخشەدانانی ئاوەدانی گەرمیان، دەشڵێت: ئەم رێنماییەی دانراوە دیراسە کراوە، لەم بابەتەشدا هیچ شتێک نەکراوە بەپێچەوانەی یاسا و رێنماییەکانه‌وه‌.