رادیۆی دەنگ

 

کرێکاری کۆمپانیای کۆکردنەوەی خۆڵ و خاشاکی گەرمیان باس لەوەدەکات کۆمپانیاکە هەڕەشەی لێکردون ئەگەر دەنگ بە لیستی یەکێتی نەدەن دەردەکرێن، بەرپرسێکی کۆمپانیاکەش دەڵێت: زۆرمان لەکەس نەکردوە.

 

کرێکارێکی کۆمپانیای ئانزۆ کە کاری کۆکردنەوەی خۆڵ و خاشاکە لە گەرمیان و نەیویست ناوی بهێنرێت، بە رادیۆی دەنگی وت: لە رێگەی گروپ چاتی کرێکارەکان و جگە لەوەش بەدەمی پێیانوتوین کە یەکێتی پاڵپشتی کۆمپانیاکە دەکات، بۆیە دەبێت ئێوەش دەنگ بە لیستی یەکێتی بدەن.

 

وتیشی: پێتان وتوین ئەگەر دەنگ بە لیستی یەکێتی نەدەن و وێنەی دەنگدانەکەتان نەگرن و نەیهێنن بۆمان، ئەوا مەیەنەوە بۆ سەر کار.

 

لە بەرامبەردا، سەرپەرشتیاری کۆمپانیای ئانزۆ، رەتیکردەوە فشاریان کردبێت.

 

ئاکۆ ئەبوبەکر، بۆ رادیۆی دەنگ، وتی: دەنگدان ئازادە و هەرکەس مافی خۆیەتی چۆن دەنگ دەدات.

 

دەشڵێت: حەقی خۆمانە داوا بکەین دەنگ بدەن بە یەکێتی، لەبەر ئەوەی یەکێتی پشتیوانی پرۆژەکە دەکات، هەروەها ئەمە داواکردنە نەک سەپاندن.