رادیۆی دەنگ

 

دواى گه‌ڕانه‌وه‌ى ناوى كه‌مده‌رمه‌تان بۆ وه‌رگرتنى 144 شوقه،‌ ناڕه‌زایه‌تى به‌دواى خۆیدا هێنا له‌لایه‌ن ئه‌و كەسانەی كه‌ پێشتر ‌ فۆرمیان پڕکردبویەوە، بەڕێوبەرایەتی ئاوه‌دانكردنه‌وه‌ى گه‌رمیانیش ده‌ڵێت: ئه‌و ناوانه‌ى گه‌ڕاونه‌ته‌وه‌ نزیكه‌ى 50 كه‌سیان له‌ كۆنه‌كانن.

 

پشتیوان عه‌بدوڵڵا، به‌ڕێوبه‌رى به‌ڕێوبه‌رایه‌تى ئاوه‌دانكردنه‌وه‌ى گه‌رمیان، بۆ رادیۆى ده‌نگ وتى: پێش 10 ساڵ فۆرمى ئه‌و كه‌سانه‌ ئاماده‌كرا بۆ سودمەندبون لەو 144 شوقەیەی کەمدرامەتان به‌پێى خاڵبه‌ندیی، بۆ ئه‌وه‌ى سودمەندبن له‌ وه‌رگرتنى ئەو شوقانە‌.

 

وتیشی: به‌ڵام به‌هۆى ئه‌وه‌ى 10 ساڵ به‌سه‌ر پرۆسەی ناوتۆمارکردنەکەدا تێپه‌ڕی، به‌ بڕیارى وه‌زیر جارێكى تر له‌ رێگه‌ى لینكى ئه‌لكترۆنیه‌وه‌ ناوه‌كان بۆ وەرگرتنی ئەو شوقانە تۆماركرانەوە.

 

ده‌شڵێت: دواتر ئه‌و فۆرمانه‌مان برده‌ وه‌زاره‌ت بۆ ئه‌وه‌ى كارى له‌سه‌ر بكه‌ن، پێیان راگه‌یاندین با ئەوانیش لینكه‌كه‌ پڕبكەنەوە و ده‌كرێت به‌پێى خاڵبه‌ندى ناویان دەربچێت.

 

جه‌ختى له‌وه‌شكرده‌وه‌: به‌پێى ئه‌و به‌راوردكارییه‌ى كه‌ كراوه‌ له‌ به‌ڕێوبه‌رایه‌تى ئامار، ئه‌و ناوانه‌ى كه‌ گه‌ڕاونه‌ته‌وه‌، نزیكه‌ى 50 خێزانیان له‌و خێزانانەن کە پێشتر ناویان تۆمارکردبو و جارێکی تریش لە تۆمارکردنە تازەکەدا لە رێگەی ئۆنلاینەوە خۆیان تۆمارکردبو.