رادیۆی دەنگ

 

دروستكردنی بەردەوامی خانی ئاژەڵ لەناو و نزیکی گەڕەكەكانی ناحیەی رزگاریی، نیگەرانی هاوڵاتیانی لێکەوتوەتەوە، شارەوانی ناحیەكەش دەڵێت: ئەم گرفتە لە دیاردە دەرچوە و بوەتە رۆتینێكی رۆژانە.

 

چەند هاوڵاتییەکی ناحییەی رزگاریی، بە رادیۆی دەنگیان وت: کێشەی دروستکردنی گەوڕ و خانی ئاژەڵان لەناو گەڕەکەکان بەتەواوی هەراسانی کردوین، لەکاتێکدا ئەم کارە بەپێی یاسا قەدەغەیە، کەچی حکومەت هیچ لێپێچینەوەیەک ناکات.

 

لایخۆشییەوە، ئەرسەلان ئەحمەد، سەرۆكی شارەوای ناحیەی رزگاریی، جەختی لە دیاردەکە کردەوە و بە رادیۆی دەنگی وت: کێشەکە تەنانەت لە دیاردەش دەرچوە و بوەتە رۆتینێكی رۆژانە.

 

لەبارەی ئەوەی کەوایە بۆچی لێپێچینەوە ناکەن؟ ئەرسەلان ئەحمەد وتی: لە ساڵانی رابردودا بە مەبەستی چارەسەركردنی ئەو گرفتە هەر خاوەن ئاژەڵێك زەوییەكی پێدرا دور لە شوێنی نیشتەجێبون، ئەمەش بەمەبەستی دورخستنەوەیان، بەڵام سەرەڕای ئەوەش هێشتا لە گەڕەكەكاندا خان دروست دەكەن.

 

دەشڵێت: لیژنەشمان پێكهێناوە بۆ ئەو مەبەستە و چەندینجار خانەكانمان روخاندوە، بەڵام هەر دروستی دەكەنەوە.

 

باسی لەوەشكرد: نەبونی هۆبەی یاسایی گرفتێكی سەرۆکایەتییەکەیانە کە بەوتەی خۆی بەوهۆیەوە ناتوانن ئەو كەسانەی کە سەرپێچی دەكەن، سزا بدەن.