رادیۆی دەنگ

 

بەهۆی کەمیی هۆڵەکانی بەڕێوەبەرایەتیی هاتوچۆی گەرمیانەوە، قەرەباڵەغییەکی زۆر لە کاتی دەرهێنان و نوێکردنەوەی مۆڵەتی شۆفێریی و ساڵانەی ئۆتۆمبیلدا دروست دەبێت، وتەبێژی هاتوچۆی گەرمیانیش دەڵێت: هۆکارەکەی بۆ کەمیی کۆمپیوتەر دەگەڕێتەوە.

 

سامان عەلی، وتەبێژی بەڕێوەبەرایەتی هاتوچۆی گەرمیان، لە لێدوانێکدا بۆ رادیۆی دەنگ، بونی ئەم گرفتەی پشتڕاست کردەوە و رایگەیاند: "ئەم بابەتە خۆی لە چەند گرفتێکدا دەبینێتەوە، لەکاتی دابینکردنی هۆڵەکە تەنها 3 کۆمپیوتەریان بۆ داناوین، لە کاتێکدا نوێکردنەوەی هەر مۆڵەتێک نزیکەی 20 خولەک دەخایەنێت."

 

ئاماژەی بەوەشکرد: "کەمیی ئەم کۆمپیوتەرانە هۆکاری سەرەکیی قەرەباڵەغی هۆڵەکانە و دابینکردنی ئەم 3 کۆمپیوتەرەش لە دەسەڵاتی ئێمەدا نییە و لە وەزارەتەوە بۆمان دابین کراوە."

 

ئەم دۆخە وایکردوە هاوڵاتیان کاتێکی زۆر لە بەڕێوەبەرایەتی هاتوچۆ بەسەربەرن و گلەیی و ناڕەزایەتی دەرببڕن، بەڵام وتەبێژی هاتوچۆی گەرمیان هیچ ئاماژەیەکی نەدا بە ئەگەری چارەسەرکردنی کێشەکە لە ماوەیەکی کەمی داهاتودا.