رادیۆی دەنگ

 

تائێستا ئەو 3 کادیرەی بەرەی گەل کە لە گەرمیان دەستگیرکران، بە دەستبەسەریی ماونەتەوە، کەسێکی نزیکی یەکێک لە دەستگیرکراوەکانیش دەڵێت: پێیان وتوین بە مادەی خراپبەکارهێنانی مۆبایل گیراون.

 

کەسێکی نزیکی یەکێک لە سێ کادرە راگیراوەکەی بەرەی گەل لە گەرمیان کە ئامادە نەبو ناوی بهێنرێت، بە رادیۆی دەنگی وت: تائێستا نەمانتوانیوە لە زیندان بیانبینین، بەو هۆیەشەوە پارێزەرمان بۆ نەگرتون.

 

وتیشی: بەو سۆراغەی کردومانە، پێیان وتوین دۆخیان باشە و لێکۆڵینەوەیان لەگەڵدا دەکرێت.

 

لەبارەی ئەوەی بە چ مادەیەک راگیراون، ئەو کەسە نزیکەی یەکێک لە راگیراوەکان وتی: پێیان وتوین بە مادەی خراپ بەکارهێنانی ئامێرەکانی پەیوەندییکردن "مۆبایل" دەستگیرکراون.

 

دوشەو پێشتر، 3 کادیری بەرەی گەل کە پێکهاتبون لە: نەوزاد کەریم، رێبوار عەبدولکەریم و عەباس محەمەد، دوای بانگهێشتکردنیان بۆ بارەگای ئاسایشی گەرمیان، دەستگیرکران و لەوکاتەوە دەستبەسەرن.